Ճապոնիայում հեղուկացված բնական գազի ներմուծումն անցած ամիս կրճատվել է՝ հասնելով 20 տարվա ընթացքում նվազագույնին, քանի որ էներգիայի խնայողության եւ միջուկային էներգետիկայի խթանման ջանքերը նվազեցրել են հանածո վառելիքի պահանջմունքը, տեղեկացրել է Bloomberg-ը։
Մատակարարումները կրճատվել են՝ մայիսին հասնելով 4 մլն տոննայի, ինչը մոտ 30 տոկոսով քիչ է անցած տարվա նույն ժամանակամիջոցի համեմատ եւ ամենացածր ցուցանիշն է 2002-ից ի վեր, վկայում են կառավարության տվյալները։ Գազի պաշարները Ճապոնիայի պահեստարաններում այնքան մեծ են, որ ներմուծողներն առաջարկել են խմբաքանակներ վաճառել անցած ամիս։
Ճապոնիայի կառավարությունը դիմել է տնային տնտեսություններին եւ ձեռնարկություններին էներգիան խնայելու կոչով՝ այն բանից հետո, երբ անցած տարվա էներգետիկ ճգնաժամը հանգեցրել էր էներգահամակարգի ծանրաբեռնվածության, էլեկտրանէներգիայի անջատումների հավանականության եւ կոմունալ ծառայությունների հաշիվների ավելացման։ Վերջին ամիսներին ՀԲԳ եւ ածխի գների իջեցումը եւս օգնել է վառելիքի ներմուծման ծախսերի կրճատմանը էլեկտրաէներգիայի ազգային արտադրողների համար եւ թուլացրել էլեկտրաէներգիայի գների ճնշումը։
Ճապոնիայում ՀԲԳ մատակարարումների կրճատումն օգնում է մեղմել վառելիքի գլոբալ դեֆիցիտը՝ գինն իջեցնելով վերջին երկու տարում ամենացածր մակարդակին։
