Մեքսիկայի Խալիսկո նահանգի դատախազությունը հայտնել է, որ Գվադալախարայի մերձակայքում գտնվող ձորում հայտնաբերվել է մարդկային մնացորդներով 45 պարկ, որոնք բնութագրերով համապատասխանում են զանգերի կենտրոնի անհետ կորած յոթ աշխատակիցներին, հաղորդում է CNN-ը։
Հաղորդվել էր, որ Մեքսիկայի արեւմուտքում՝ Գվադալախարայի շրջանում մայիսի 20-ից մայիսի 22-ն ընկած ժամանակահատվածում անհետ կորել են զանգերի կենտրոնի յոթ աշխատակիցներ:
Խալիսկոյի նահանգի դատախազ Լուիս Խոակին Մենդես Ռուիսն ասել է, որ իրենք մարդկային մնացորդներով պարկեր են հայտնաբերել ավտոկայանատեղիում:
Դատաբժշկական փորձագետները դեռ պետք է պարզեն զոհերի թիվը եւ նրանց ինքնությունները։
Խալիսկոյի դատաբժշկական ինստիտուտը աշխատում է անհետ կորածների ընտանիքների հետ՝ պարզելու համար զոհերի ինքնությունը:
Մեքսիկան մտահոգված է անհետացումների մեծ թվով. ավելի քան 100,000 մեքսիկացիներ եւ միգրանտներ դեռեւս անհետ կորած են համարվում։
Առեւանգումները եւ մարդկային առեւտուրը նույնպես Մեքսիկայի որոշ մասերում արտասովոր երեւույթ չէ, հատկապես սահմանամերձ շրջաններում, իսկ Մեքսիկայում սպանությունների ընդհանուր մակարդակն աշխարհում ամենաբարձրերից մեկն է:
