Ես չեմ որոշում ում ինչ պաշտոնի նշանակել. Արտակ Պողոսյանը մասնակցել է մրցույթի, հաղթել է մրցույթում եւ նշանակվել է ՀՀ վարչապետի կողմից՝ իմ ներկայացմամբ: Այս մասին այսօր՝ հունիսի 2-ին, ԱԺ-ում լրագրողների հետ զրույցում ասաց Հակակոռուպցիոն կոմիտեի նախագահ Սասուն Խաչատրյանը՝ անդրադառնալով իր տեղակալ Արտակ Պողոսյանի նշանակմանը:
Հարցին, թե իրեն չի՞ մտահոգում, որ Արտակ Պողոսյանը տարիներ առաջ ոստիկանությունում բռնության է ենթարկել ֆոտոլրագրող Անի Գեւորգյանին, Սասուն Խաչատրյանը պատասխանեց. «Պողոսյան Արտակը անցել է նաեւ բարեվարքության ստուգում եւ նրա վերաբերյալ բացասական եզրակացություն չի տրվել: Դուք նման դատավճիռ ունե՞ք: Այ երբ կբերեք դատավճիռ, որ Արտակ Պողոսյանը մարդ է ծեծել, ես ձեզնից ներողություն կխնդրեմ եւ ինքս կմիջնորդեմ, որ Արտակ Պողոսյանը ազատվի»:
