Սինգապուրում 50-ամյա ուսուցիչն ավելի քան 170 վիդոներ է նկարահանել գործընկերների ու ուսանողների կիսաշրջազգեստների տակ և ստացել տասը ամսվա ազատազրկում, հայտնում է The Straits Times-ը։

Նյութը հայտնում է, որ նրա աշակերտներից մեկը կասկածել է, որ ուսուցիչը կիսաշրջազգեստի տակ վիդեո է նկարում, և դիմել է ոստիկանություն։ Տղամարդու անունը չի հրապարակվում զոհերի ինքնությունը պաշտպանելու հրամանի պատճառով, սակայն հայտնի է, որ նա 50 տարեկան է, ունի երեք երեխա։

Անցյալ տարվա սեպտեմբերին տղամարդն իրեն մեղավոր է ճանաչել կանանց մաքրաբարոյությունը վիրավորելու երեք մեղադրանքով, պատիժը կայացնելիս հաշվի է առնվել եւս հինգ մեղադրանք։ Դատարանի տվյալներով՝ 2015-2018 թվականներին հանցագործի զոհ են դարձել առնվազն 47 տարբեր կանայք։

Դատավորը նշել էր, որ այդ ընթացքում տղամարդը տառապել է ծանր դեպրեսիվ խանգարումով, սակայն դատաբժշկական փորձագետը դա պատճառ չի համարել ազատազրկման ժամկետը պարտադիր բուժմամբ փոխարինելու համար, քանի որ նա պահպանել է գիտակցված ընտրություն կատարելու կարողությունը և կարող էր հրաժարվել հանցագործություններ կատարելուց։

Ուսուցիչը դատապարտվել է տասը ամիս և երկու շաբաթ ազատազրկման։ Նա կարող է ազատ արձակվել 15000 սինգապուրյան դոլար գրավի դիմաց։ Փաստաբանն ասել է, որ իր պաշտպանյալը մտադիր է բողոքարկել դատավճիռը։