Հայկական կողմը Թուրքիայի հետ սահմանին «Մարգարա» անցակետի ենթակառուցվածքը կարգի բերելու աշխատանք է իրականացնում եւ շուտով ավարտին կհասցնի այն։ Հույս ունենք, որ թուրքական կողմը նույնպես կպահի խոսքը։ Այս մասին հայտարարել է Թուրքիայի հետ հարաբերությունների կարգավորման բանակցությունների համանախագահ Ռուբեն Ռուբինյանը հունիսի 26-ի մամուլի ասուլիսում՝ պատասխանելով մինչեւ զբոսաշրջանային սեզոնի սկիզբը սահմանը երրորդ երկրների քաղաքացիների եւ դիվանագիտական անձնագրեր ունեցող անձանց համար բացելու պայմանավորվածության մասին հարցին։
Ինչպես հավաստիացրել է Ռուբինյանը, գործընթացը տեղում կանգնած չի մնացել, եւ նա ինքն էլ կապի մեջ է Թուրքիայի ներկայացուցչի հետ։ Առայժմ հանդիպման պահմանավորվածություն չկա, ավելացրել է Ռուբինյանը՝ դա բացատրելով պայմանավորվածության առկայությամբ եւ այն իրականացնելու անհրաժեշտությամբ։ Նման գործընթացներում, երբ կա վստահության պակաս, կարեւոր է պահել խոսքը, ամփոփել է Ռուբինյանը։