Նյու Հեմփշիրում մենք մեծ հայկական սփյուռք ունենք, և նրանցից հաճախ ենք լսում նրանց մտահոգությունները, որ Ադրբեջանի կողմից շրջափակումը լուրջ հումանիտար տառապանքների պատճառ է դարձել և այն պետք է անմիջապես վերացվի։ Որպես Կոնգրեսի սակավաթիվ անդամներից մեկը, որը Հայաստանում որոշ ժամանակ է անցկացրել՝ կարող եմ ասել՝ սա այնպիսի խնդիր է, որ մենք պարտավոր ենք օգնել լուծել։ Այս մասին այսօր՝ սեպտեմբերի 14-ին, Սենատի արտաքին հարաբերությունների հանձնաժողովում «Լեռնային Ղարաբաղում ճգնաժամի գնահատում» խորագրով լսումների ժամանակ նշեց սենատոր Ջեյն Շահինը:
«Օգտակար քայլերից մեկը կարող է լինել Սենատի կողմից Ադրբեջանում դեսպանի նշանակման հաստատումը։ Կարծում եմ՝ մեզ համար օգտակար կլինի այնտեղ դեսպան ունենալ, որը կարող է ներկայացնել խնդիրը և թե ինչ է կատարվում Լեռնային Ղարաբաղում։
Կարո՞ղ եք ասել՝ Ռուսաստանն այժմ ինչ դեր է խաղում Լեռնային Ղարաբաղում և տեղի ունեցող բանակցություններում»,-նա հարց ուղղեց ԱՄՆ Պետքարտուղարության Եվրոպայի ու Եվրասիայի հարցերով բյուրոյի փոխտեղակալ Յուրի Քիմին:
Վերջինս պատասխանեց. «Ռուսաստանը միջնորդ է հանդիսացել Հայաստանի և Ադրբեջանի միջև հրադադարի հաստատման հարցում 2020 թվականի սարսափելի բռնություններից հետո և ստանձնել խաղաղապահների եւ այդ հայտարարության դրույթների կատարման երաշխավորի դերը: ԱՄՆ-ն ոչ մի ներգրավվածություն չի ունեցել այդ գործընթացում: Մեր գնահատմամբ, և կարծում եմ՝ թե՛ Հայաստանում, թե Ադրբեջանում կիսում են կարծիքը, որ Ռուսաստանը չի արել այն, ինչ պետք է աներ: Մենք մեկ տարի առաջ տեսանք, որ նորից կոնֆլիկտ բռնկվեց Ռուսաստանի ներկայությամբ: Խելամիտ է պահանջել ռուսներից կատարել իրենց գործառույթները՝ կանխելու հետագա բռնությունը: ՌԴ ֆունկցիան է ապահովել նաև Լաչինի միջանցքի վերաբացումը, դա նրանց պարտավորությունն է՝ որպես խաղաղապահներ: Մենք, չլինելով այդ հայտարարության կողմ, հնարավորն անում ենք այդ ուղղությամբ եւ շարունակելու ենք ավելին անել, որովհետեւ կարծում ենք՝ բացարձակ հրատապ է ԼՂ-ի բնակչությանը սնունդ հասցնելը: Սննդի ու դեղորայքի մատակարարումը չպետք է խաթարվի քաղաքական վեճերի պատճառով։ Կարծում եմ՝ ամբողջ աշխարհը պետք է հարցնի՝ ինչ է Ռուսաստանն անում ԼՂ-ում իրավիճակը բարելավելու համար:
Մենք գիտենք, որ ԼՂ-ում ռուս զինվորները ուղղաթիռներով սնունդ ու մատակարարումներ են ստանում: Տեղյակ ենք նաև, որ Լեռնային Ղարաբաղ մուտք գործած միակ բեռնատարը Ռուսաստանի Կարմիր խաչին է պատկանում, բայց դա բավարար չէ, դա այն չէ, ինչը ՌԴ-ն որպես պարտավորություն ստանձնել է Լեռնային Ղարաբաղի ժողովրդի անվտանգությունը ապահովելու համար, և այն չէ, ինչի մասին պայմանավորվել ԼՂ ներկայացուցիչները եւ Ալիեւը համաձայնել էին, այլ այն, որ Լաչինի միջանցքը եւ մյուս ճանապարհները անհապաղ և միաժամանակ պետք է բացվեն»:
