Ռուս խաղաղապահները վերջին մեկ օրվա ընթացքում փորձել են Ղարաբաղից դուրս բերել կանանց ու երեխաներին, սակայն նրանց թույլ չեն տվել դա անել: Այս մասին NEWS.am-ի հետ զրույցում ասաց ռուս պատմաբան Մոդեստ Կոլերովը։
Եվլախում կայանալիք բանակցությունները նա անվանեց իշխանության փոխանցման բանակցություններ։
Կոլերովը ենթադրում է, որ բանակցությունների առարկա կարող է դառնալ նաեւ Ղարաբաղից Հայաստան բնակչության հեռանալու համար միջանցք ապահովելու հարցը։
Պատմաբանը հավելեց, որ Ղարաբաղից կհեռանան բոլորը։
«Նախ, Ղարաբաղի բնակչության բացարձակ մեծամասնությունն արդեն չի հիշում, թե ինչ է ադրբեջանական իշխանությունը։ Նրանք չեն կարող ապրել նոր իշխանության պայմաններում։
Երկրորդ, Բաքվի պաշտոնական հայտարարություններն այն մասին, թե, իբր, Ադրբեջանում ապրում է ավելի քան 40 հազար հայ, երբեք չեն ապացուցվել։ Ոչ մի անգամ չեն ցուցադրվել հայ բնակչության կենսապայմանները՝ դպրոցներ, թերթեր, մշակութային հաստատություններ եւ այլն։ Դրանից ոչինչ չկա:
Այս ամենը խոսում է այն մասին, որ Ադրբեջանում հայերի ազգային գոյատեւման համար պայմաններ չկան»,-նշեց նա ։