Վայքում արդեն 5-րդ օրն է, որ գործում է կենտրոնը. առաջին օրվանից էլ հոսքը շատ մեծ է ու գնալով ավելի է մեծանում։ Այս մասին NEWS.am-ի հետ զրույցում ասաց Վայք խոշորացված համայնքի ղեկավար Մխիթար Մարտիրոսյանը։

Նա ասաց, որ երեկվա դրությամբ 15 հազար մարդ է գրանցվել կենտրոնում։ Վայքում համայնքապետարանը տեղավորել է 600 տեղահանվածի։

«Գալիս են այստեղ, Միգրացիոն ծառայությունը նրանց տվյալները գրանցում է ու առաջարկում է տարբեր մարզերում տեղեր, որ մարզում որ մարդիկ ծանոթ կամ բարեկամ են ունենում, այդ մարզերում տեղեր են առաջարկում ու մարդկանց տեղափոխում ենք այդ մարզեր»,- ասաց Մարտիրոսյանը։

Նա հայտնեց, որ Վայք համայնքում այժմ վերջացել են ազատ տները. «Ընթացքում փնտրում ենք, եթե գտնում ենք նույնիսկ վարձով, վերցնում ենք ու տրամադրում ենք այդ տները մարդկանց։ Գյուղական բնակավայրերում ունենք տներ. կան, որ այդքան էլ վիճակը բարվոք չէ, բայց մենք խոսք ենք տվել, որ ամեն ինչ կանեն, որ մարդկանց մնալու պայմանները կապահովենք»։