ԱՄՆ-ում 104-ամյա Դորոթի Հոֆները Չիկագոյից ոչ պաշտոնապես դարձել է աշխարհի ամենատարեց պարաշուտիստը, գրում է Chicago Tribune-ը։
104-ամյա Դորոթի Հոֆները ոչ պաշտոնապես դարձել է ամենատարեց մարդը, որը պարաշուտով թռիչք է իրականացրել: Թռիչքին հետեւել են տեղի բնակիչներն ու լրագրողները։ Պաշտոնական ռեկորդը սահմանվել է 2022 թվականի մայիսին 103-ամյա շվեդուհի Լինեա Ինգեգերդ Լարսոնի կողմից։ Skydive Chicago ընկերությունն աշխատում է, որպեսզի Հոֆների ցատկը Գինեսի համաշխարհային ռեկորդների գրքում ճանաչվի որպես ռեկորդային:
Չիկագոյի բնակչուհին իր առաջին ցատկը կատարել է 100 տարեկանում և որոշել, որ իր հաջորդ թռիչքն ավելի նշանային կլինի: Նա ցանկանում էր համաշխարհային ռեկորդ սահմանել. Իր առաջին ցատկից չորս տարի անց Հոֆները հրահանգիչ Դերեկ Բաքսթերի օգնությամբ պատմական թռիչք կատարեց Իլինոյս նահանգի Օտտավա քաղաքում:
Վայրէջք կատարելուց հետո թոշակառուն և նրա զուգընկերը ձեռքով են արել հավաքվածներին։ Chicago Tribune-ի լրագրող Ջեյք Շերիդանի տրամադրած կադրերում Հոֆները դիմում է հանդիսականներին ու լրագրողներին իր պատմական ցատկից հետո:
«Հրաշալի է երկրի վրա հայտնվելը։ Բայց այնտեղ՝ վերեւում, նույնպես հրաշալի էր։ Ավելի լավ չէր կարող լինել, եթե մենք ինքներս մտածեինք այդ մասին: Տարիքը պարզապես թիվ է, գիտեք»,- ասել է նա:
Ամերիկուհին ակնարկել է, որ ապագայում հնարավոր է երրորդ ցատկը կատարի և օդապարիկով էքսկուրսիա իրականացնի։ Հոֆները նաև շնորհակալություն է հայտնել մամուլին և հանդիսատեսին իր համար նշանավոր դրվագի ականատեսը լինելու համար:
