նախընտրելի դարձնելՄարտունու բնակիչը, հոկտեմբերի 25-ին՝ տեղական ինքնակառավարման մարմինների ընտրությունների քվեարկության օրը, NEWS.am-ի հետ զրույցում հայտարարել է տեղական ինքնակառավարման մարմինների ընտրությունների ընտրացուցակների անարդար կազմման մասին։ Նա պատմել է, որ ցուցակներում բացակայում են համայնքից կարճ ժամանակով արտագնա աշխատանքի մեկնած որոշ բնակիչների անունները, մինչդեռ տասնամյակներ շարունակ արտերկրում ապրող քաղաքացիները պահպանել են ընտրելու իրավունքը։
«Մարդիկ, որոնք չորս-հինգ ամիս բացակայել են համայնքից, ընտրացուցակներում չեն ընդգրկվել։ Բայց նրանց անունները, ովքեր արդեն 30–40 տարի ապրում են Ֆրանսիայում և ընդհանրապես գյուղ չեն գալիս, այնտեղ կան։ Ես նման մոտեցումը սխալ և խտրական եմ համարում», — հայտարարել է NEWS.am-ի զրուցակիցը։
Ըստ նրա, Մարտունիում տարածված է սեզոնային աշխատանքային միգրացիան․ բնակիչները մեկնում են գարնանը և վերադառնում աշնանը։ Սակայն, ինչպես պատմել է տղամարդը, ցուցակները կազմելիս այդ հանգամանքը որոշ քաղաքացիների նկատմամբ հաշվի չի առնվել։
«Ես այս միտումը տեսնում եմ արդեն վեցերորդ տարին և շատ դժգոհ եմ նման կանխակալ վերաբերմունքից, հատկապես ընտրությունների ժամանակ։ Ես իմ գյուղում ապրել եմ 63 տարի, երկար տարիներ աշխատել եմ որպես ուսուցիչ, և կարող եմ ասել, որ նախկին իշխանությունների ժամանակ նման վերաբերմունք չի եղել», — նշել է Մարտունու բնակիչը։
