Եվրահանձնաժողովը հայտնել է, որ ինքնահռչակ Կոսովոյի Հանրապետության դեմ նախկինում կիրառված պատժամիջոցները ուժի մեջ են մնում, քանի որ Պրիշտինայի կողմից լրացուցիչ քայլեր են պահանջվում տարածաշրջանի լարվածությունը թուլացնելու համար։ Այս մասին ասվում է ԵՀ-ի տարեկան զեկույցում, տեղեկացնում է РИА Новости-ն։
ԵՄ արտաքին քաղաքականության խոսնակ Պիտեր Ստանոն հուլիսի սկզբին ասել էր, որ ԵՄ-ի և Կոսովոյի ինքնահռչակ հանրապետության միջև կայունացման և ասոցացման համաձայնագրի մարմնի աշխատանքը կասեցվել է, Պրիշտինայի ներկայացուցիչներն առայժմ չեն հրավիրվի բարձր մակարդակի ֆորումներին, ինքնահռչակ հանրապետության համար IPA-ի հիմնադրամների ծրագրերի շրջանակներում ֆինանսավորումը նույնպես կասեցվել է։
«Իրադրության լիցքաթափման ուղղությամբ վճռական քայլերի բացակայության պատճառով և հունիսի 3-ի հայտարարության համաձայն՝ ԵՄ-ն մի շարք միջոցառումներ է իրականացնում Կոսովոյի հետ կապված, ինչը վերաբերում է նաև ֆինանսական օգնությանը։ Այս միջոցները ժամանակավոր են և կարող են ամբողջությամբ վերացվել՝ կախված Հյուսիսային Կոսովոյում լարվածությունը նվազեցնելու ուղղությամբ ձեռնարկվող քայլերից։ Կոսովոն (ինքնահռչակ - խմբ.) քայլեր է ձեռնարկել ճիշտ ուղղությամբ, բայց դեռ շատ ավելին պետք է անել», - ասված է ԵՀ-ի չորեքշաբթի օրը հրապարակած տարեկան զեկույցում։
Ընդգծվում է, որ Բելգրադի և Պրիշտինայի հարաբերությունները տարվա ընթացքում նշանավորվել են մի քանի ճգնաժամերով, որոնցից ամենամեծը սեպտեմբերի 24-ին Կոսովոյի հյուսիսում տեղի ունեցած զինված բախումներն էին։ Այս համատեքստում ԵՀ-ն կոչ է արել Հյուսիսային Կոսովոյում շտապ տեղական ինքնակառավարման մարմինների ընտրություններ անցկացնել այնտեղ բնակվող սերբերի մասնակցությամբ՝ տեղական իշխանություններ ձևավորելու համար։
