Ֆինլանդիան առաջիկա երկու շաբաթվա ընթացքում կփակի Ռուսաստանի հետ իր ամբողջ սահմանը ճանապարհորդների համար՝ կասեցնելու համար ապաստան հայցողների հոսքը դեպի Սկանդինավյան երկիր, հայտնում է Reuters-ը՝ վկայակոչելով երկրի կառավարությանը։
Այս որոշումը նշանակում է, որ երկու երկրների միջև կարող են անցնել միայն բեռնափոխադրումները։
Անցյալ շաբաթ Ֆինլանդիան իր բոլոր սահմանային անցումները, բացառությամբ մեկի, փակեց Ռուսաստանից ժամանած ճանապարհորդների համար՝ բաց թողնելով միայն իր ամենահյուսիսային անցումը, որը գտնվում է Արկտիկայում: Բայց այն նույնպես այժմ փակ կլինի՝ թույլատրելով միայն ապրանքների փոխադրումը, ասել են կառավարությունից։
Ֆինլանդիայի սահմանապահ ծառայության տվյալներով՝ նոյեմբերին Ռուսաստանից Ֆինլանդիա է մտել մոտ 900 ապաստան հայցող, այդ թվում՝ Քենիայից, Մարոկկոյից, Պակիստանից, Սոմալիից, Սիրիայից և Եմենից:
