Սամվել Շահրամանյանը ձեզ համար է նախագահ, ինձ համար նախագահ չի: Այս մասին այսօր՝ նոյեմբերի 29-ին, 44-օրյ պատերազմի հանգամանքներն ուսումնասիրող ԱԺ քննիչ հանձնաժողովում փակ հանդիպումից հետո լրագրողների հետ զրույցում ասաց Լեռնային Ղարաբաղի Անվտանգության խորհրդի նախկին քարտուղար, պաշտպանության նախկին նախարար Սամվել Բաբայանը:
«Որովհետեւ չի կարելի Սահմանադրությունը խախտել, 22 հոգով, բանդայով հավաքվել, ընտրել: Չեն կարող Սահմանադրությունը ինչ-որ 22 հոգով նստեն, փոխեն: Դա անթույլատրելի է»,-ասաց նա:
Սամվել Բաբայանը հիշեցրեց, որ ինքն առաջարկել է իր թեկնածությունը Արցախի նախագահի պաշտոնի համար, սակայն ոստիկանությունը մերժել է, ասել է՝ դուք Արցախի քաղաքացի չեք, Հայաստանի քաղաքացի եք. «Հիմա էլ Հայաստանում ասում են՝ դուք Ղարաբաղի քաղաքացի եք»,- ասաց նա:
Անդրադառնալով րցախցիների վերադարձի խնդրին, Բաբայանն ասաց. «Ես Ղարաբաղի ղեկավարությանն առաջարկել եմ հանդիպել, կետ առ կետ անցնել՝ ոնց ենք պատկերացնում արցախցիների վերադարձը, ինչ կարգավիճակով, դեռ արձագանք չեմ ստացել»:
