ՄԱԿ-ի գլխավոր քարտուղար Անտոնիո Գուտերեշն ասել է, որ 2023 թվականը պատմության մեջ ամենաշոգ տարին էր, և մարդկությունը կլիմայական փլուզման մեջ է։ Այս մասին նա հայտարարել է Կլիմայի փոփոխության մասին ՄԱԿ-ի շրջանակային կոնվենցիայի (COP28) 28-րդ համաժողովի մասնակիցներին ուղղված ձայնագրված տեսաուղերձում։
«Տարվա ավարտից մեկ ամիս առաջ արդեն կարող ենք հայտարարել, որ 2023 թվականը դարձել է մարդկության պատմության ամենաշոգ տարին։ Մենք իրական ժամանակում կլիմայական փլուզում ենք ապրում, դրա հետևանքները կործանարար են»,- ասել է Գուտերեշը՝ ընդգծելով, որ դա պետք է «սարսուռ» առաջացնի համաշխարհային առաջնորդների մեջ և «դրանց շարժի գործի»։
Ըստ Համաշխարհային օդերևութաբանական կազմակերպության՝ հինգշաբթի հրապարակված նախնական զեկույցի, հոկտեմբերի վերջին միջին գլոբալ ջերմաստիճանը 1,4 աստիճանով բարձր է եղել նախաարդյունաբերական մակարդակից:
Տարբերությունը նախորդ ռեկորդների հետ, որոնք սահմանվել էին 2016 և 2020 թվականներին, արդեն այնքան մեծ է, որ նոյեմբեր և դեկտեմբեր ամիսների տվյալները չեն փոխի ընդհանուր իրավիճակը, նշել են ՄԱԿ-ում։
