Կասպից ծովի վերաբերյալ ցանկացած որոշում պետք է հաշվի առնի ափամերձ բոլոր հինգ երկրների միջև կոնսենսուսը, հայտարարել է Իրանի արտաքին գործերի նախարար Հոսեյն Ամիր Աբդոլլահյանը, հաղորդում է Mehr-ը։
Երեքշաբթի օրը Մոսկվայում կայացած Կասպից ծովի ափամերձ հինգ երկրների արտգործնախարարների հանդիպման ժամանակ իրանցի բարձրաստիճան դիվանագետն ասաց, որ Իրանը, Ռուսաստանը, Ադրբեջանի Հանրապետությունը, Ղազախստանը և Թուրքմենստանը պետք է կոնսենսուսի հասնեն Կասպից ծովի վերաբերյալ յուրաքանչյուր որոշման շուրջ:
Ընդգծելով ափամերձ հինգ պետությունների միջև սերտ համագործակցության անհրաժեշտությունը՝ Ամիր Աբդոլլահյանն ասել է, որ Կասպից ծովը բարեկամության կենտրոն է և օրհնության աղբյուր նրա շուրջը ապրող 250 միլիոն մարդկանց համար։
«Կասպյան տարածաշրջանում անվտանգությունն անբաժանելի է, և մենք բոլորս պատասխանատվություն ենք կրում դրա համար»,- հավելել է նա։
Կոլեկտիվ համագործակցությունն անվանելով «Կասպից ծովը բարեկամության խորհրդանիշի վերածելու միակ միջոցը»՝ Իրանի արտգործնախարարն առաջարկել է համապատասխան մեխանիզմները կառավարող քարտուղարություն ստեղծելու գաղափարը։
«Անհրաժեշտ է ամրապնդել տնտեսական, առևտրային և տրանսպորտային համագործակցությունը՝ որպես մերձկասպյան երկրների զարգացման և առաջընթացի շարժիչ ուժ»,- ասել է նա։
