Այն պատճառներով, որ կործանվեց Արցախը, այդ նույն պատճառները առկա են նաեւ Հայաստանում, մի տարբերությամբ, Հայաստանը միջազգայնորեն ճանաչված պետություն է: Այս մասին NEWS.am-ի հետ զրույցում նշեց Արցախի ՏԿԵ նախկին նախարար Հայկ Խանումյանը:
«Խոսքը թե բանակի վիճակի մասին է, ի դեպ, Արցախի բանակն ավելի լավ վիճակում էր, թե տարածքային անհամաչափ զարգացվածությամբ, բնակչության անհամաչափ բաշխվածությամբ, թե տնտեսական որոշակի խնդիրների մասին է, թե պետական կառավարման ընթացակարգերում եղած տարբեր խնդիրների մասին է:
Եթե այդ խնդիրները չենք կարողանում լուծել, բանակ չենք կարողանում կառուցել, շատ ծանր ժամանակներ են մեզ սպասվում:
Ես չեմ տեսնում, որ ՊՆ-ում կամ Գլխավոր շտաբում կա այդ գիտակցումը, թե ինչպիսի բանակ պետք է ունենանք, ինչ խնդիրներ պետք է այն լուծի: Եվ չեմ տեսնում, որ կա քաղաքական կամք գտնել այն մարդկանց, որոնք այդ խնդիրների լուծումները տեսնում են եւ կարող են լուծումները տալ: Մարդիկ կուսակցական նեղ շրջանակից չեն կարողանում դուրս գալ, լուծումներ են գտնում կուսակցական նեղ մակարդակում, բնականաբար, չէն կարողանալու գտնել»,-ասաց նա:
Խնումյանի խոսքով, գոնե պետք է վերլուծեին պարտության պատճառները. «Խիստ կասկածում եմ, որ վերլուծել են: Արդյոք ԳՇ-ն վերլուծություն է իրականացրել պատերազմում պարտության պատճառների մասին: Ես տեղյակ եմ, որ որոշակի զեկույցներ կան, բայց դրանք մանկապատանեկան մակարդակի են, լուրջ վերլուծություններ չկան: Ինչպես պատերազմը կառավարվել է, երբ օրական տասնյակ կմ-ներ հեւիհեւ փախչող գեներալներին հերոսի կոչումներ էին տալիս, որ իբր նրանք առաջ են գնում, նույն ձեւով էլ վերլուծվել է պատերազմի պարտության պատճառները: Իրականում ԳՇ-ն կտրված է զորքերից, զորքերի ծառայությունից եւ շատ հաճախ տեղյակ չէ՝ ինչ է կատարվում: Ուռճացված կառույցներ են: Մի կորպուսի չափ անձնակազմ Երեւանում նստած թուղթ է մրոտում առանց բանակի խնդիրներին ծանոթ լինելու»,- նկատեց Խանումյանը: