ԵՊՀ-ում, այսօր` նոյեմբերի 7-ին, բացվել է հայ-հնդկական տեղեկատվական եւ հաղորդակցության տեխնոլոգիանեռրի կենտրոն՝ Հայաստանի եւ Հնդկաստանի կառավարությունների միջեւ կնքված համաձայնագրի շրջանակում: Բացմանը մասնակցել են Հայաստանի վարչապետ Տիգրան Սարգսյանը եւ Հնդկաստանի կապի եւ տեղեկատվական տեխնոլոգիաների պետնախարար Սաչին Պիլոտին:
Կառավարության մամուլի ծառայությունից NEWS.am-ին հայտնում են, որ Կենտրոնի նպատակն է խորացնել երկկողմանի համագործակցությունը ՏՀՏ ոլորտում եւ նպաստել երկրում համաշխարհային մակարդակի բարձրակարգ ՏՀՏ ոլորտի աշխատուժի զարգացմանը, կազմակերպել համատեղ հետազոտական աշխատանքներ եւ այլն:
Շնորհավորելով կենտրոնի բացման կապակցությամբ՝ վարչապետը նշել է, որ այն նոր թափ է հաղորդելու ՏՀՏ ոլորտի հեզատոզատական աշխատանքներին եւ ուսումնական ծրագրերի իրականացմանը: Նշելով, որ կենտրոնի դասախոսները վերապատրաստում են անցել Հնդկաստանում եւ ուսումնասիրել դասավանդման ոլորտի նոր մեթոդները, վարչապետն ընդգծել է, որ նրանց կուտակած փորձն օգտակար է լինելու նաեւ Գյումրիի տեխնոպարկի զարգացման աշխատանքներում:
Ի դեպ, կենտրոնը համալրվել է PARAM գերհամակարգչով, որը տարածաշրջանում միակն է: Այն, վարչապետի խոսքով, բացառիկ հնարավորություն է ստեղծելու առաջին հերթին նոր հետազոտական աշխատանքների իրականացման համար:
Կենտրոնը ապահովվել է անհրաժեշտ ենթակառուցվածքներով, բարձրակարգ փորձագետներով եւ համակարգչային անհրաժեշտ բոլոր սարքավորումներով:
Կենտրոնի ստեղծման եւ գործունեության ծրագրի գործընկերն է Երեւանի պետական համալսարանը: Կենտրոնի հիմնման աշխատանքներին աջակցել է նաեւ Համաշխարհային բանկի հայաստանյան գրասենյակը: