«Զվարթնոց» օդանավակայանից ռուս սահմանապահներին դուրս բերելու վերաբերյալ քննարկումներին չեմ մասնակցել, բայց կարծում եմ՝ ճիշտ կլինի, որ իրենք այնտեղից դուրս գան։ Այս մասին, այսօր՝ փետրվարի 27-ին, ԱԺ-ում լրագրողների հետ զրույցում նշեց ԱԺ նախագահ Ալեն Սիմոնյանը:
Նրա պնդմամբ՝ Հայաստանը կպաշտպանի իր երկրի սահմանները։
«Ես վստահ չեմ, որ իրենք մեր երկրի սահմանները կպաշտպանեն, դուք վստա՞հ եք: Մի քանի անգամ ապացուցվել է, որ չպաշտպանեցին, ամեն ինչ արեցին, որ սահմանները շատ ավելի խոցելի լինեն։ Եկան Ղարաբաղ՝ ի՞նչ արեցին. հայ ժողովրդին դուրս ուղեկցեցի՞ն, դա՞ էր պաշտպանել: Մի օր էլ գան «Զվարթնոց»-ից ինձ ու ձեզ ուղեկցե՞ն դուրս»,-ասաց Սիմոնյանը:
Դիտարկմանը, որ գուցե պետք է ռուսական ռազմակայանը հանե՞լ Հայաստանից, Ալեն Սիմոնյանն ասաց. «Շատ եք գնում առաջ, շատ եք շտապում: Կքննարկենք, կհասկանանք: Չի կարելի մի ծայրահեղությունից մյուս ծայրահեղության մեջ ընկնել»:
Լրագրողի հարցին, թե ի՞նչ հիմքով են ռուս զինվորականները կանգնած Ներքին Հանդում, Ալեն Սիմոնյանն արձագանքեց. «Ես չգիտեմ՝ իրավական հիմքի վերաբերյալ, բայց պետք է ասեմ, որ դա նույնպես քննարկման առարկա է»։