News
Լրահոս
News
Կիրակի
Ապրիլ 21
Տեսնել լրահոսը

Նաիրի Զարյանի անվան թիվ 130 հիմնական դպրոցի աշակերտները դասադուլ են անում՝ իրենց բողոքն արտահայտելով տնօրեն Նվարդ Հովսեփյանի դեմ։ Այս մասին այսօր՝ փետրվարի 28-ին NEWS.am-ի հետ զրույցում պատմեց դպրոցի աշխատակիցներից մեկը:

«Աշակերտները դասադուլի փորձեր են անում, միջանցք են դուրս գալիս, բայց մենք թույլ չենք տալիս, որ նման կերպ իրենց պահեն: Չնայած նրան, որ դպրոցի աշխատակիցները փորձում են թույլ չտալ դասադուլ իրականացնել, այնուամենայնիվ առավոտվանից դասապրոցեսը պատշաճ տեղի չի ունենում: Այս պահին դպրոցում նաեւ ոստիկաններ կան»,- պատմեց նա։

Աշխատակցի խոսքով՝ խնդիրը ոչ թե անձնական է, այլ համակարգային․ «Աշխատակիցներից շատերին դուր չեն գալիս այն մեթոդները, որոնցով տնօրենը՝ Նվարդ Հովսեփյանը ղեկավարում է  դպրոցը: Բարձրաձայնվող խնդիրները, որոնք վերաբերում են թե՛ աշակերտների կարգապահությանը, թե՛ աշխատակիցների միջեւ հարաբերություններին, երբեք վերջնական լուծումներ չեն ստանում»։

Անդրադառնալով Նվարդ Հովսեփյանի տարածած հայտարարությանը, թե անհամաձայնությունների պատճառը թերությունների պատճառով ստացած նկատողություններն են, դպրոցի աշխատակիցն ասաց, որ թերացումներ եւ նկատողություններ միշտ կարող են լինել, սակայն  նրանք չեն ցանականում, որ դրանք արվեն բոլորի ներկայությամբ եւ վիրավորական տոնով․

«Փոխտնօրեններին ուսուցիչների ներկայությամբ է նկատողություն անում, ուսուցիչներին՝ աշակերտների, աշակերտներին էլ միջանցքում՝ մյուս աշակերտների ներկայությամբ․ սա է խնդիրը»,-պարզաբանեց աշխատակիցը եւ հավելեց, որ տնօրենը խուսափում է աշխատակիցների հետ շփումից եւ խնդրի մասին զրուցելուց, հիմնականում իր աշխատասենյակում է գտնվում: 

Նա նշեց նաեւ, որ եթե խնդիրը լուծում չստանա, երեք փոխտնօրեններն էլ, որոնց դիմումները դեռեւս մակագրված չեն, կհրաժարվեն իրենց լիազորություններից:

Հիշեցնենք, որ նախօրեին Նաիրի Զարյանի անվան թիվ 130 հիմնական դպրոցի բակում աշակերտների ծնողները բողոքի ակցիա էին իրականացնում եւ հանդիպում էին պահանջում տնօրեն Նվարդ Հովսեփյանի հետ: Ծնողները նշում էին, որ նոր տնօրենի՝ գործունեության 1,5 տարում տասնյակ ուսուցիչներ են սեփական դիմումի համաձայն աշխատանքից ազատվել: Երեկ էլ երեք փոխտնօրեններն են միաժամանակ ազատման դիմում ներկայացրել:

Տպել
Ամենաշատ