Պերուի գլխավոր դատախազությունը սկսել է նախնական հետաքննություն Նախարարների խորհրդի նախագահ Ալբերտո Օտարոլայի նկատմամբ՝ պետական պաշտոններին ծանոթ-բարեկամներին նշանակելու պատճառով։

«Գլխավոր դատախազությունը սկսել է նախնական քննություն Ալբերտո Օտարոլայի նկատմամբ, որը զբաղեցնում է Նախարարների խորհրդի նախագահի պաշտոնը»,- նշվել է գերատեսչության հայտարարությունում։

Վարչապետին կասկածում են «անօրինական հովանավորչության» եւ այն գործղություններին աջակցելու մեջ, որոնք անհամատեղելի են պետծառայողի պաշտոնի հետ։ «Դա կապված է Յասիրո Վասկեսին պաշտպանության նախարարությունում վարձելու հետ»,- տեղեկացրել է գլխավոր դատախազությունը։

Panamericana Televisión հեռուստաալիքի եթերում մինչ այդ հրապարակվել էր Օտարոլայի եւ Վասկեսի խոսակցության ձայնագրությունը, որից երեւում է, որ նրանց միջեւ ռոմանտիկ կապ կա։ Վարչապետը հերքում է իր մեղքը։ Նա X-ում գրել է, որ հասկանում է «քաղաքական կոնյունկտուրայի լրջությունը», բայց հայտնել է, որ «ոչ մի անօրինական գործողություն չի կատարել»։