Ապրիլի 4-ին Ազգային ժողովում տեղի են ունենում խորհրդարանական լսումներ «Հայաստանի եվրաինտեգրման նոր հեռանկարները եւ մարտահրավերները» թեմայով։
Լսումները տեղի են ունենում եվրոպական ինտեգրման մշտական հանձնաժողովի ղեկավար Արման Եղոյանի նախագահությամբ եւ խորհրդարանականների, տարբեր ՀԿ-ների ներկայացուցիչների, մասնագետների մասնակցությամբ։
Եղոյանն իր ներածական խոսքում, մասնավորապես, անդրադարձել է Հայաստանի եվրաինտեգրման գործընթացի պատմությանը։ «Եթե ԵՄ-ի հետ ստորագրված Համապարփակ եւ ընդլայնված գործընկերության մասին համաձայնագրի բոլոր կետերն իրականացվեն ոչ թե ձեւականորեն, այլ բովանդակային առումով, Հայաստանի եվրաինտեգրման գործընթացը կգրանցի մի քանի քայլ առաջ»,- ասել է Եղոյանը։ Նա նշել է. 2020թ. հետո ԵՄ-ն նկատելիորեն ակտիվացել է Հարավային Կովկասի տարածաշրջանում։ Դրա համար, ըստ նրա, տարբեր պատճառներ կային։
«2021թ. ԵՄ-ն Հայաստանին առաջարկել է նոր տնտեսական եւ ներդրումային ծրագիր՝ 2,6 մլրդ եվրո աջակցության փաթեթով։ Դա աջակցություն է դրամաշնորհների եւ վարկերի ձեւով։ Ներկա պահին մեզ արդեն տրամադրվել է 550 մլն եվրո։ Այդ միջոցների մեծ մասը կազմել են արտոնյալ վարկերը՝ ուղղված փոքր եւ միջին բիզնեսի աջակցմանը»,- ընդգծել է խորհրդարանականը։
