Ամասիայի համայնքային ոստիկանները ստացել էին տեղեկություն, որ Գտաշեն գյուղում գործող սահմանափակ պատասխանատվությամբ մի ընկերության քարի հանքում իրականացվում է ապօրինի արդյունահանում:
Ոստիկանությունից NEWS.am-ին հայտնում են, որ ապրիլի 10-ին իրավապահները ստուգման նպատակով այցելեցին քարհանք: Հայտնաբերվեցին տուֆի մեծաբեկորով բեռնված մի «ԿամԱԶ» և տրակտոր:
Տնօրենը հրավիրվեց բաժին: Նրա հետ զրույցից պարզվեց, որ նա հանքարդյունաբերությունը կազմակերպում է առանց հողատարածք օգտագործելու պայմանագրի, նաև ներկայացրել է գործունեության վերաբերյալ թերի փաստաթղթեր:
Ըստ տվյալների` սահմանափակ պատասխանատվությամբ ընկերության 29-ամյա տնօրենը համայնքի սեփականություն հանդիսացող և օտարման ոչ ենթակա հողատարածքում իրականացրել է հանքարդյունաբերական աշխատանքներ, ինչի հետևանքով էական վնաս է պատճառվել Ամասիա համայնքին:
Շիրակի մարզային քննչական վարչությունում նախաձեռնվել է քրեական վարույթ, վնասի չափն ու այլ հանգամանքներ պարզվում են:
