Բրիտանական կառավարությունը երկուշաբթի հայտարարել է, որ տրամադրում է 500 միլիոն ֆունտ (617 միլիոն դոլար) օգնություն Ուկրաինային և ուկրաինացիներին կհանձնի ռազմական օգնության իր համար ռեկորդային փաթեթ, որը ներառում է 1600 հրթիռ:
Այս քայլերի մասին պաշտոնապես կհայտարարվի երեքշաբթի օրը Մեծ Բրիտանիայի վարչապետ Ռիշի Սունակի Լեհաստան այցի ժամանակ, սակայն կառավարությունը երկուշաբթի օրն արդեն հայտարարություն է տարածել դրա մասին։
«Հայտարարված 500 միլիոն ֆունտ ստերլինգ լրացուցիչ ֆինանսավորումը կուղղվի անհրաժեշտ զինամթերքի, հակաօդային պաշտպանության, անօդաչուների և ինժեներական միջոցների արագ մատակարարմանը: Անօդաչու սարքերը կգնվեն Միացյալ Թագավորությունից»,- ասվում է կառավարության հաղորդման մեջ:
Մեծ Բրիտանիայի պաշտպանության նախարարության պատրաստած ռազմական օգնության փաթեթը, ըստ մամուլի հաղորդման, կներառի ավելի քան 1600 հարվածային և զենիթային հրթիռ, այդ թվում՝ Storm Shadow թևավոր հրթիռների նոր խմբաքանակ, 60 նավակ և մոտորանավակ, 160 Husky զրահամեքենա, 162 այլ զրահամեքենա, 78 ամենագնաց և մոտ չորս միլիոն փամփուշտ: