Ապրիլի լույս 23-ի գիշերը ռուսաստանյան զորքերը գրոհային անօդաչուներով հարվածել են Օդեսային, ինչի հետևանքով տուժել է ինը մարդ, հայտնել է շրջանի ռազմական վարչակազմի ղեկավար Օլեգ Կիպերը։
Տուժածների թվում չորս երեխա կա՝ երկուսը մինչև մեկ տարեկան, մյուս երկուսը ինը և տասներկու տարեկան են, ասել է Կիպերը՝ հավելելով, որ նրանք միջին ծանրության վիճակով գտնվում են հիվանդանոցում։
Երեք չափահաս տուժածները նույնպես հոսպիտալացվել են միջին ծանրության վիճակով, երկուսը հրաժարվել են հոսպիտալացումից։
Հարձակման արդյունքում ավերվել են բնակելի շենքեր։ Օդեսայի քաղաքապետ Գենադի Տրուխանովի վկայությամբ, առնվազն 14 բնակարան է վնասվել։
Կիևը նույնպես ենթարկվել է անօդաչուների հարձակմանը։ Քաղաքի վարչակազմի տվյալներով, քաղաքի վրա արձակված բոլոր անօդաչուները խոցվել են։ Ավերածություններ և տուժածներ չկան։
Ուկրաինայի ռազմաօդային ուժերի հրամանատար Նիկոլայ Օլեշչուկը հայտնել է, որ ապրիլի լույս 23-ի գիշերը Օդեսայի, Կիևի, Նիկոլաևի և Չերկասի շրջաններում ոչնչացվել է ռուսաստանյան զորքերի արձակած 16 անօդաչուից 15-ը։ Բացի այդ, ռուսաստանյան զորքերը երկու «Իսկանդեր-Մ» բալիստիկ հրթիռներով գրոհել են ուկրաինական տարածքը, հայտնել է Օլեշչուկը։