ԱՄՆ-ն պատժամիջոցներ է մշակում, որոնք կարող են չինական որոշ բանկերի կտրել համաշխարհային ֆինանսական համակարգից, գրում է The Wall Street Journal-ը՝ հղում անելով աղբյուրներին։ Այսպիսով, Վաշինգտոնը հույս ունի դադարեցնել Պեկինի աջակցությունը ռուսական ռազմական արդյունաբերությանը։
Ըստ ամերիկացի պաշտոնյաների, Պեկինի օգնությունը Մոսկվային թույլ տվեց վերականգնել իր ռազմարդյունաբերական ներուժը, քանի որ Չինաստանը դարձավ Ռուսաստանի Դաշնության էլեկտրոնային սխեմաների, ինքնաթիռների մասերի, մեքենաների և հաստոցների հիմնական մատակարարը: Բանկերը հիմնական միջնորդներն են դեպի Ռուսաստան առևտրային արտահանման, վճարումների մշակման և հաճախորդ ընկերություններին առևտրային վարկերի տրամադրման գործում, պարզաբանում է պարբերականը։ Ամերիկացի պաշտոնյաներն ակնկալում են, որ դոլարի հասանելիությունը կորցնելու սպառնալիքը և Եվրոպայի հետ առևտրային կապերի վատթարացման վտանգը Պեկինին կստիպի «փոխել ուղղությունը»։
Միևնույն ժամանակ, պարբերականի զրուցակիցները պարզաբանել են, որ բանկերի դեմ պատժամիջոցների կիրառումը «էսկալացիայի տարբերակ է», եթե դիվանագիտական մեթոդները չկարողանան համոզել Պեկինին սահմանափակել իր արտահանումը Ռուսաստան։
Վերջին շաբաթներին Վաշինգտոնը մեծացրել է ճնշումը Պեկինի վրա մասնավոր հանդիպումների և զանգերի ժամանակ՝ զգուշացնելով, որ ԱՄՆ-ը պատրաստ է միջոցներ ձեռնարկել չինական բանկերի դեմ։ Ըստ The Wall Street Journal-ի զրուցակիցների, Վաշինգտոնը հույս ունի, որ դիվանագիտական ճնշումը թույլ կտա խուսափել պատժամիջոցների սահմանումից, որոնք կարող են խաթարել Միացյալ Նահանգների և Չինաստանի միջև «փխրուն զինադադարը»։