Ի՞նչ տավուշեցի, ի՞նչ ղարաբաղցի, ի՞նչ գեղաքունիքցի, բոլորս էլ մեկ ենք, մենք հայրենիք ունենք, հայրենիք սիրող ենք, որ ասում են՝ ինչ անենք, ում կողքին կանգնենք, եկե՛ք՝  իրար կողք կանգնենք։ Այս մասին այսօր՝ ապրիլի 23-ին, հայտարարեց Երեւան-Սեւան մայրուղին փակած քաղաքացիներից մեկը:

Դիտարկմանը, թե Նիկոլ Փաշինյանը հայտարարում է, որ տարածքները չհանձնելու դեպքում կարող է պատերազմ սկսել, քաղաքացին ասաց․ «Ո՞վ է Նիկոլ Փաշինյանը, ես Հայաստանի վարչապետ չեմ ճանաչում։ Եթե թուրքի հետ ապրելը լավ է, գնացեք խնդրենք Ալիևին մի հատ գյուղ տա, գնացեք այդ 100 հոգով ապրեք մենք չենք ուզում իրենց հետ ապրենք»։

Մեկ ուրիշն էլ հավելեց. «Ինչ կա, տալիս են, ամեն ինչ տալիս են։ Չե՞ք տեսնում։ Սա էլ մի սարքեք քաղաքական հարց՝ սա նրա մարդն է, նրա մարդն է։ Մենք հայ ենք, հայրենիքի մարդ ենք, դուրս ենք եկել ու մեր հողի համար ենք կռվում:

Այս իշխանությունները մենակ ծախեն, տան, այդ մի բանն են լավ անում։  Ոչ մեկ չի վախենում պատերազմից։ Այսպես կզած ինչքա՞ն պետք է ապրենք։ Եկեղեցի, գերեզման, ամեն ինչ բաժանում են։ Մեր եկեղեցուն, գերեզմանին տեր կանգնե՞նք, թե ոչ»։

Նշենք, որ շուրջ մեկ ժամ մայրուղին փակ պահելուց հետո ճանապարհը բացվեց: Ակցիայի մասնակիցները նշեցին, որ մարդիկ կան, որ պետք է գնան եւ մասնակցեն Երեւանում ջահերով երթին:

Հիշեցնենք` Հայաստանի և Ադրբեջանի սահմանազատման հարցերով հանձնաժողովներն ապրիլի 19-ին պայմանավորվել են սահմանազատումը սկսել Տավուշի մարզից։ Սահմանագծի տվյալ հատվածների նկարագրությունը կազմվելու է` հաշվի առնելով տեղանքում գեոդեզիական չափումների արդյունքում կատարված կոորդինատների հստակեցումը, որը կձևակերպվի համապատասխան արձանագրություն-նկարագրությամբ, ինչը կողմերի միջև պետք է համաձայնեցվի ու ստորագրվի մինչև 2024 թ. մայիսի 15-ը:

ՀՀ վարչապետի աշխատակազմը հայտարարել է, որ Ադրբեջանն այս ամենի արդյունքում 2.5 գյուղ է ստանում, իսկ Հայաստանի Հանրապետությունը` սահմանազատման հետ կապված և անվտանգային ռիսկերի նվազեցում։ Կիրանց գյուղի հատվածում ճանապարհի մի քանի հարյուր մետրանոց հատվածի փոփոխություն կարվի, իսկ Ոսկեպարը ճանապարհի խնդիր չի ունենա։ Սահմանազատումից հետո չորս գյուղերի հատվածում զինված ուժերը հետ կքաշվեն և տեղը կզիջեն սահմանապահ զորքերին:

Տավուշի սահմանամերձ գյուղերի բնակիչներն ապրիլի 19-ից բողոքի ակցիաներ են անում Հայաստան-Վրաստան միջպետական ճանապարհին: Նրանք դեմ են սահմանազատման այն տարբերակին, որը համաձայնեցրել են Երևանն ու Բաքուն։