ԱՄՆ նախագահ Ջո Բայդենն ապրիլի 24-ին կստորագրի Ուկրաինային ռազմական օգնության մասին օրինագծերի փաթեթը, որը հաստատվել է Կոնգրեսի կողմից, որպեսզի Վաշինգտոնը կարողանա այս շաբաթ վերսկսել զենքի մատակարարումները Կիևին։ Այս մասին ասվում է ամերիկացի առաջնորդի հայտարարության մեջ, որը երեքշաբթի հրապարակել է Սպիտակ տան մամուլի ծառայությունը։
«Ես կստորագրեմ այս օրինագիծը և կդիմեմ ամերիկացի ժողովրդին հենց որ այն վաղը հայտնվի իմ աշխատասեղանի վրա, որպեսզի մենք այս շաբաթ սկսենք զենք և տեխնիկա ուղարկել Ուկրաինա»,- ասել է Բայդենը:
Ապրիլի 20-ին օրինագծերը հավանության են արժանացել ԱՄՆ Կոնգրեսի Ներկայացուցիչների պալատում, իսկ երեքշաբթի օրը՝ Սենատում։ Փաթեթի ծավալը կազմել է 95 մլրդ դոլար, այն ներառում է, մասնավորապես, 61 մլրդ դոլար՝ Ուկրաինայի, 26 մլրդ դոլար՝ Իսրայելի, ինչպես նաև միջոցներ՝ հակամարտությունների գոտիներում, այդ թվում՝ Գազայի հատվածում, մարդասիրական օգնություն տրամադրելու համար։
Օրինագծերի փաթեթը նախատեսում է պատժամիջոցների սահմանում Իրանի և Ռուսաստանի պաշտոնյաների նկատմամբ և իրանական անօդաչոների արտադրության համար օգտագործվող ամերիկյան տեխնոլոգիաների արտահանման հետագա սահմանափակում։ Այն պարունակում է իրանական նավթի արտահանումը սահմանափակող միջոցներ։ Բացի այդ, փաթեթը ներառում է ԱՄՆ-ում TikTok-ի հնարավոր արգելքի նախաձեռնությունը։ Օրենսդիրներն առաջարկում են չինական ByteDance ընկերությանը մեկ տարի ժամանակ տալ սոցիալական ցանցը վաճառելու համար, հակառակ դեպքում TikTok-ը կարող է արգելվել ԱՄՆ-ում։
