Ռուսաստանի պաշտպանության փոխնախարար Թիմուր Իվանովը ձերբակալվել է կաշառք վերցնելու կասկածանքով (Քրեական օրենսգրքի 290-րդ հոդվածի 6-րդ մաս), հայտնել է Քննչական կոմիտեն։ Այս լուրի հրապարակման պահին գործի կամ ձերբակալության մասին մանրամասներ չկան։
Իվանովը պաշտպանության փոխնախարարի պաշտոնը զբաղեցնում էր 2016 թվականի մայիսի 23-ից։ 2012 թվականին նա եղել է Մոսկվայի մարզի կառավարության նախագահի տեղակալը, իսկ 2013-ից 2016 թվականներին գլխավորել է ՊՆ-ին ենթակա «Օբորոնստրոյ» ընկերությունը, որը զբաղվում է զինվորականների համար բնակարանաշինությամբ։
Անմիջականորեն պաշտպանության նախարարությունում նա շարունակել է զբաղվել բնակարանային հարցերով, այդ թվում՝ ՌԴ ՊՆ օբյեկտների վերակառուցման և վերանորոգման և զինվորական հիփոթեքով:
Իվանովը եղել է Զինված ուժերի տաճարի և «Պատրիոտ» այգու շինարարության համակարգողներից մեկը։ Նրա վկայությամբ, տաճարի կառուցման համար հավաքվել է ավելի քան երկու միլիարդ ռուբլի։
Ռուսաստանի Ուկրաինա լայնամասշտաբ ներխուժումն սկսվելուց հետո ընդգրկվել է ԱՄՆ-ի և Մեծ Բրիտանիայի պատժամիջոցների ցանկում՝ ռուսաստանյան ագրեսիային աջակցելու և պատերազմ սկսելու պատասխանատվության պատճառով։ Ավելի ուշ հայտնվել է նաև Եվրամիության, Ավստրալիայի, Ճապոնիայի, Ուկրաինայի, Շվեյցարիայի, Կանադայի և Նոր Զելանդիայի պատժամիջոցների տակ:
2022 թվականի դեկտեմբերին Իվանովը պատասխանող կողմ է եղել Հակակոռուպցիոն հիմնադրամի հետաքննության շրջանակներում։ Խոսքը վերաբերել է պաշտոնյայի շքեղ անշարժ գույքի, զբոսանավերի և Սեն-Տրոպեում հանգստի համար տասնյակ հազարավոր եվրոյի հաշիվներին։ Քննիչները պարզել են նաև, որ պատերազմի սկզբում պաշտպանության փոխնախարարի կինը՝ Սվետլանա Իվանովան, մեկնել է Փարիզ, որտեղ ապրել է քաղաքի ամենաթանկ հյուրանոցներից մեկում։ Բացի այդ, նա տասնյակ հազարավոր եվրոների գնումներ է արել և, ռուսաստանցիների համար պաշտոնապես փակ սահմանների պարագայում այցելել է Լոնդոնում գտնվող որդուն, ինչից հետո վերադարձել է Փարիզ։
