Ֆրանսիայի նախագահ Էմանուել Մակրոնը ձգտելու է խորացնել անձնական կապը Չինաստանի նախագահ Սի Ծինփինի հետ Ֆրանսիա կատարելիք նրա այցի ժամանակ, այդ թվում որպեսզի Սին ազդի Կրեմլի ղեկավար Վլադիմիր Պուտինի վրա Ուկրաինայում պատերազմի հարցում։ Այս մասին տեղեկացրել է Bloomberg գործակալությունը՝ հղում կատարելով աղբյուրներին։
Չինաստանի նախագահ Սի Ծինփինը հինգ տարում առաջին անգամ մեկնում է Եվրամիություն՝ հավաստիացնելու, որ Պեկինն ավելի մեծ տնտեսական հնարավորություններ է առաջարկում ԵՄ-ին, քան ԱՄՆ-ն պատրաստ է ընդունել։
Չինաստանի նախագահն իր հնգօրյա այցը Ֆրանսիա, Սերբիա եւ Հունգարիա սկսելու է մայիսի 5-ին։ Այդ երկրները ձգտում են ներդրումներ ստանալ Չինաստանից՝ չնայած ԵՄ հետաքննություններին Պեկինի արդյունաբերական քաղաքականության հարցում եւ Վաշինգտոնի պաշտոնյաների՝ ռիսկերի մասին նախազգուշացումներին։
Ֆրանսիայի նախագահ Էմանուել Մակրոնը ձգտելու է խորացնել իր անձնական կապը Սիի հետ նրա Ֆրանսիա կատարելիք երկօրյա այցի ընթացքում, գոնե այն բանի համար, որ Չինաստանի նախագահը Վլադիմիր Պուտինին հորդորի դադարեցնել պատերազմն Ուկրաինայում, նշել են աղբյուրները, որոնք ծանոթ են Ֆրանսիայի նախագահի ծրագրերին։
Նրանց խոսքով՝ Մակրոնը նաեւ ձգտելու է չինական միջոցներ ներգրավել էլեկտրամեքենաների համար։
Մակրոնը Սիին կընդունի Փարիզում, Ելիսեյան պալատում ընթրիք կազմակերպելով, որտեղ, աղբյուրների խոսքով, կերակրացանկում կլինի ֆրանսիական կոնյակ, որը Պեկինում ենթարկվում է հակադեմպինգային հետաքննության։
Այնուհետեւ Մակրոնն իր չինացի պաշտոնակցին կհրավիրի Պիրենեյան լեռների այն անկյուն, որտեղ Ֆրանսիայի նախագահը մանուկ հասակում այցելել է իր տատիկին, ավելացրել են աղբյուրները։