Մենք արտաքին հովանավորներ չունենք, և չենք էլ ունենալու: Էն մարդիկ, կուսակցությունները և դրանց ղեկավարները, ովքեր երբևիցե ասեն, որ մենք Ռուսաստանի հետ կապ ունենք, կամ Ռուսաստանի շպիոններն ենք, դա կոնկրետ Նիկոլական պրոպագանդան է: Այս մասին այսօր՝ մայիսի 1-ին Նոր ուժ» կուսակցության հիմնադիր համագումարի շրջանակներում լրագրողների հետ զրույցում նշեց Երեւանի նախկին քաղաքապետ Հայկ Մարությանը:
Նրա խոսքով, նորաստեղծ կուսակցությունն առաջակում է հարևան պետությունների՝ Վրաստանի և Իրանի հետ ունենալ լավ հարաբերություններ, Թուրքիայի և Ադրբեջանի հետ կառուցել արժանապատիվ հարաբերություններ՝ պաշտպանել երկրի շահերը: Բացի այդ, նա շեշտեց, որ պետք է եվրոպական երկրների հետ ինտեգրման պրոցեսն ընթանա, որովհետև մենք շատ սերտ կապված ենք այդ քաղաքակրթության հետ:
«Մենք եվրոպական ժողովուրդ ենք, եվրոպական ձևով ենք մտածում, մեր քաղաքում, երբ դուրս ես գալիս փողոց, զգում ես, որ եվրոպական քաղաքում ես՝ մտածելակերպը, արժեքները և այլն: Պետք չի նոր գնալ, մենք էդտեղ ենք, ուղղակի պետք է ամրապնդել այս ամեն ինչը: Մենք պետք է լավ կապեր ունենանք Ռուսաստանի Դաշնության հետ, ԱՄՆ-ի հետ, Հնդկաստանի և Չինաստանի հետ, այսինքն բոլոր խաղացողների հետ պետք է մեր հարաբերությունները կարգավորենք ճիշտ մասնագետների և գործողությունների միջոցով»,-հավելեց նախկին քաղաքապետը: