Սլովակիայի վարչապետ Ռոբերտ Ֆիցոյի, որը դեմ էր Ուկրաինային զենք տրամադրելուն եւ նրա անդամակցությանը ՆԱՏՕ-ին, եւ որի դեմ մահափորձ է կատարվել, վիճակը կայուն է, հինգշաբթի տեղեկացրել է շրջակա միջավայրի նախարարության պետքարտուղար Ֆիլիպ Կուֆան։
«Վերջին տվյալներով՝ վարչապետ Ռոբերտ Ֆիցոն կայուն վիճակում է»,- գրել է Կուֆան Ֆեյսբուքի իր էջում։
Ֆիցոյի դեմ մահափորձը կատարվել է չորեքշաբթի, Գանդլովա քաղաքում կառավարության արտագնա նիստից հետո, Սլովակիայի մայրաքաղաք Բրատիսլավայից 190 կիլոմետր հեռու։ Վարչապետին ուղղաթիռով տեղափոխել են հիվանդանոց։ ՆԳՆ-ն տեղեկացրել է, որ Ֆիցոյի վիճակը կրիտիկական է։ Մահափորձի ժամանակ հարձակվողը հինգ գնդակ է արձակել նրա գլխին։ ՆԳՆ տվյալներով՝ նա քաղաքական դրդապատճառներով է առաջնորդվել։ Սլովակյան ԶԼՄ-ները տեղեկացրել են, որ Սլովակիայի վարչապետի դեմ մահափորձը կատարել է 71-ամյա գրող Յուրայ Ցինտուլան, որը կրակել է Ֆիցոյի վրա, երբ վարչապետը մոտեցել է ողջունելու մարդկանց, որոնք կառավարության նիստի անցկացման վայրի մոտ էին։