Ուղղաթիռի կործանման հետեւանքով զոհված Իրանի նախագահ Էբրահիմ Ռաիսիի եւ արտաքին գործերի նախարար Հոսեյն Ամիր-Աբդոլահիանի վերջին հրաժեշտի արարողությունն ավարտվել է երկրի հյուսիսարեւմտյան Թավրիզ քաղաքում։ Այս մասին տեղեկացրել է Իրանի խորհրդարանի պատգամավոր Ռուհոլա Մոթեֆակեր Ազադը։
«Հրաժեշտի արարողությունը, [որին մասնակցել են Իրանի] Արեւելյան Ադրբեջան նահանգի բազմաթիվ բնակիչներ, կմնա պատմության մեջ»,- ավելացրել է Մոթեֆակեր Ազադը IRNA գործակալության մեկնաբանությունում։
ԶԼՄ-ի տեղեկացմամբ՝ երթին մասնակցել է մի քանի հազար մարդ։ Կառավարական հաստատություններում իջեցրել են ազգային դրոշները։ Հրաժեշտի արարողության ժամանակ մարդիկ տանում էին ավիավթարի զոհերի նկարները։ Տղամարդիկ եւ կանայք լալիս էին, բարձր կրոնական բացականչություններ անում։
Ռաիսիի դագաղը նախագահական ինքնաթիռով ուղարկվել է Թեհրան, հետո՝ Կում քաղաք ուղարկելու համար, նշել է գործակալությունը։ Մոտ 10 հազար մարդ ուղեկցել է բոլոր ութ զոհերի դագաղներին։ Գործակալության տեղեկությունում ասվում է, որ «նախագահը վերադառնում է Թեհրան շրջաններ կատարած իր վերջին ուղեւորությունից հետո»։
Թեհրանում տեղի կունենա համընդհանուր աղոթք վթարի զոհերի հոգիների հանգստության համար։ Հրաժեշտի արարողություն տեղի կունենա Կում քաղաքում, որտեղ գտնվում է իրանցի շիաների կրոնական կենտրոնը։
