ՀՀ պետական բյուջեն մեր պետության կյանքի կազմակերպման մասին է: Այս մասին, այսօր՝ մայիսի 29-ին, ԱԺ հանձնաժողովներում 2023 թվականի բյուջեի կատարողականի քննարկումների ժամանակ նշեց վարչապետ Նիկոլ Փաշինյանը։
Ըստ Փաշինյանի՝ շատ կարևոր է մեկ հարցի պատասխան տալ՝ ի՞նչ հարց են լուծում բյուջեի ծախսերով։
«Պետությունը մարդկային նախաձեռնություններից ամենաթանկարժեք նախաձեռնությունն է, չկա որևէ նախաձեռնություն, որն ավելի թանկ արժե, քան՝ պետությունը»,- ասաց նա։
Վարչապետի խոսքով՝ պետք է հասկանալ, թե ինչի համար է պետությունը։
«Ի վերջո պետությունը իրեն էլիտա համարող կամ համարած մեկուսացած խմբերչի առաջ քաշած գաղափարներն իրագործելու համա՞ր է, այսինքն քաղաքացիները պետք է իրենց աշխատանքը պետք է ծայեցնեն այդ գաղափարներին, ասենք, այնպիսի գաղափարների, ինչպես օրինակ պատմական արդարություն է, թե՞ այնուամենայնիվ, սեփական բարեկեցությունն ապահովելու խնդրին: Սա շատ սկզբունքային հարց է:
Այս ճշգրտումը պետք է անպայման անել, որովհետեւ մենք պետությունը պետք է ընկալենք որպես լավ ապրելը ապահովելուն միտված գործիք։ Սա է պատճառը, որ պետությունը թանկ է, որովհետև լավ ապրելն է թանկ»,- նշեց նա։
