![](img/news/82/64/50/default.jpg)
Ուկրաինան մինչև 2024 թվականի վերջ կարգելի շաքարավազի արտահանումը Եվրամիության երկրներ: Դրա մասին հայտարարել է Ուկրաինայի ագրարային քաղաքականության և պարենի նախարարի պաշտոնակատար Տարաս Վիսոցկին։
Ըստ Reuters-ի՝ նա շեշտել է, որ Եվրոպա շաքարավազի արտահանման ծավալը հասել է առեւտրային արտոնությունների նոր կանոններով սահմանված սահմանաչափին։ Ուկրաինան Եվրոպա շաքարավազի խոշորագույն արտահանողներից մեկն է։
«Մյուս շուկաները կլինեն առանց սահմանափակումների, բայց ԵՄ շուկան բաց կլինի միայն հունվարի 1-ից, և այդ ժամանակ պարզ կդառնա՝ արտահանման ինչ ծավալներ կլինեն»,- պարզաբանել է Վիսոցկին։
Ուկրաինական շաքարավազի արտահանումը Եվրամիության երկրներ հասել է 262 հազար 600 տոննայի, ինչը համապատասխանում է ԵՄ-ի սահմանած ծավալին՝ որպես Ուկրաինայի համար 2024 թվականի քվոտա։
2023 թվականին ուկրաինացի արտադրողները Եվրամիության երկրներ են արտահանել շուրջ 493 հազար տոննա շաքար։