NEWS.am-ը որոշ կրճատումներով ներկայացնում է Արժույթի միջազգային հիմնադրամի ղեկավարի «Ինչպես արդյունավետորեն օգնել աղքատ երկրներին» հոդվածը, որը հրապարակվել է ֆրանսիական Les Echos-ում:
«Հինգ տարվա ընթացքում աղքատ երկրներն արդեն երրորդ անգամ կարող են տուժել ճգնաժամից, որը պայմանավորված է զարգացած երկրներում տիրող ֆինանսական խառնաշփոթով:
2009թ. համաշխարհային տնտեսական ճգնաժամի հետեւանքով ցածր եկամուտներ ունեցող երկրների աճը կտրուկ նվազել է: Հետեւանքները չափազանց ծանր էին սոցիալական մակարդակում. Համաշխարհային բանկի տվյալներով` եւս 64 մլն մարդ չքավորության է մատնվել:
Կարող էր ավելի վատ լինել, բայց ի շնորհիվ նախորդ տասնամյակի արդյունավետ քաղաքականության` ցածր եկամուտներ ունեցող երկրները ճգնաժամը շատ ավելի արդյունավետ հաղթահարեցին: Անկումը հարաբերականորեն կարճատեւ էր, մասնավորապես` համաշխարհային առեւտրի համար բաց լինելու շնորհիվ:
Սակայն այդ երկրները շատ խոցելի են: Նրանցից շատերը ժամանակ չեն ունեցել հարվածները մեղմելու միջոցառումներ իրականացնել: Նրանց բյուջեներն ավելի խոցելի են, ընթացիկ բալանսի դեֆիցիտը ավելացել է, նրանց պահուստները նվազել են, իսկ պարտքերը` մեծացել: Բացի այդ, քանի որ զարգացած երկրները ֆինանսական խնդիրներ ունեն, նրանցից տրամադրվող օգնությունը կարող է ապագայում էականորեն նվազել:
2012թ. ցածր եկամուտներ ունեցող երկրների համար առաջնահերթություն է ցնցումներին դիմակայելու ունակությունը: Նրանք պետք է ավելացնեն եկամտային բազան, որպեսզի առավել քիչ կախում ունենան արտաքին ֆինանսավորումից, ինչպես նաեւ մեծացնեն ծախսերի արդյունավետությունը: Մի շարք երկրներում, օրինակ` Հայաստանում, Բուրկինա-Ֆասոյում, Սիերա-Լեոնում, Գանայում եւ Քենիայում արդե այս հարցում առաջընթաց կա: Նրանք սննդի կտրոնների, մայրերին եւ ընտանիքներին օգնելու, հասարակության առավել խոցելի խմբերին, օրինակ` ծնողազուրկ երեխաներին, ֆինանսական օգնություն ցուցաբերելու ծրագրեր են մշակում:
Մոտ հեռանկարում ցածր եկամուտներ ունեցող երկրները կշահեն իրենց տնտեսությունների դիվերսիֆիկացումից, ինչը թույլ կտա կրճատել մի շարք արտադրանքներից եւ գործընկերներից ունեցած կախումը:
Օգնելու համար ԱՄՀ-ն պատրաստ է փորձագիտական խորհրդատվություն, ֆինանսական եւ տեխնիկական աջակցություն ցուցաբերել: Մենք զրոյացրել ենք 2012թ. մեր վարկերի տոկոսադրույքները` արտոնյալ պայմաններով, ավելացրել ենք դրանց ծավալը 17 մլրդ դոլարի` մինչեւ 2014թ., եւ կրկնապատկել գումարը:
Ի վերջո, միայն սեփական տանը կարգուկանոն հաստատելուց եւ ուժեղ ու կայուն աճը վերածնելուց հետո առաջադեմ երկրները կարող են արդյունավետորեն աջակցել ցածր եկամուտ ունեցող երկրներին: Դա նրանց կօգնի հետագայում էլ առաջընթաց գրանցել եւ նշանակալի հաջողությունների հասնել: