Չինաստանը Ղազախստանում երկու ատոմակայան կկառուցի (ԱԷԿ), հինգշաբթի օրը կառավարությունում կայացած մամուլի ասուլիսի ժամանակ հայտարարել է առաջին փոխվարչապետ Ռոման Սկլյարը, հաղորդում է Orda.kz-ն։ Նրա խոսքով՝ ներկայումս մշակվում են նախագծերի տեխնիկատնտեսական հիմնավորումը և նախագծային գնահատականները, ուստի դեռ շուտ է շինարարության արժեքը նշելու համար։
«Միջկառավարական համաձայնագրի, համագործակցության ձևի վերաբերյալ բոլոր հարցերը գտնվում են համաձայնեցման փուլում, այնուհետև վավերացում է կատարվում խորհրդարանում», - ասել է Ղազախստանի կառավարության ղեկավարի առաջին տեղակալը։ Ատոմային էներգիայի գործակալության մասնագետները «մշակում են ապագա կայանների տեղակայման վայրերը», որտեղ հասանելի կլինեն ջրամատակարարումը և էլեկտրաէներգիայի աղբյուրները, ասել է Սկլյարը։
Պաշտոնյան չի նշել այն չինական ընկերության անունը, որը կիրականացնի նախագիծը, սակայն ենթադրվում է, որ պայմանագիրը կտրվի China National Nuclear Corporation (CNNC)-ին, որը նախկինում ռուսական «Ռոսատոմի» հետ միասին գլխավորել է Ղազախստանի տարածքում օբյեկտների կառուցման կոնսորցիումները։
Ղազախստանում առաջին ատոմակայանը կառուցելու որոշումը կայացվել է 2024 թվականի հանրաքվեով։ Այս տարվա հունիսին Ատոմային էներգիայի գործակալությունը հայտնել է, որ երեք կայաններից առաջինը կկառուցի «Ռոսատոմը»։ Ատոմակայանը նախատեսվում է տեղադրել Ալմաթիի մարզում (Ուլկեն ավանում՝ Ժամբիլի շրջանում, Բալխաշ լճի ափին), իսկ շահագործման հանձնելը նախատեսվում է 2035-2036 թվականներին։ Մինչև 2035 թվականը Ղազախստանի իշխանությունները մտադիր են ապահովել 2.4 գիգավատտ միջուկային հզորություն։
Ղազախստանը՝ աշխարհի ամենամեծ ուրանի արտադրողը, ներկայումս չունի սեփական ատոմակայաններ և չի սպառում միջուկային արտադրանք, սակայն նրա ուրանի պաշարները կազմում են աշխարհի ուրանի պաշարների մոտ 15%-ը և զիջում են միայն Ավստրալիային։
