Երկու ոսկե եւ մեկ արծաթե մեդալներ: Ահա այսպիսի արդյունքներով վերադարձավ «Արմենիա Վայն» գինու գործարանը Մոսկվայում կայացած «Պրոդէքսպո 2012» միջազգային ցուցահանդեսից:
Փետրվարի 13-ից 17-ը Մոսկվայում տեղի ունեցավ «Պրոդէքսպո 2012» միջազգային տնտեսական ցուցահանդեսը, որին առաջին անգամ մասնակցում էր նաեւ Հայաստանի խոշորագույն գինեգործական ընկերություններից «Արմենիա Վայն» գինու գործարանը: Արձանագրելով նշանակալի տնտեսական ցուցանիշներ հայաստանյան շուկայում, «Արմենիա Վայն» ընկերությունն անցած տարի սկսեց «Արմենիա» գինիների արտահանումն Ամերիկայի Միացյալ Նահանգներ եւ Մերձբալթյան երկրներ: Ընկերությունն այս տարի խնդիր է դրել ներկայացնել «Արմենիա» գինիների հարուստ տեսականին նաեւ Ռուսաստանի Դաշնությունում: Եվ ահա առաջին արդյունքները: Ներկայանալով Մոսկվայում կայացած «Պրոդէքսպո 2012» միջազգային ցուցահանդեսին, որին մասնակցում էին շուրջ երկու հազար ընկերություն Եվրոպայից, Ասիայից, Ամերիկայից, «Արմենիա Վայն» գինու գործարանն արժանացավ երկու ոսկե եւ մեկ արծաթե մեդալի ու պատվոգրերի: Ռուսաստանի Դաշնության գյուղատնտեսության նախարարությունը 2012թ-ի լավագույն արտադրանք միջազգային մրցույթի շրջանակներում ոսկե մեդալի արժանացրեց «Արմենիա» կարմիր կիսաքաղցր գինին: Եվս մեկ ոսկե մեդալ ընկերությունն ստացավ ալկոհոլային խմիչքների արտադրության լավագույն որակի համար: «Արմենիա» սպիտակ չոր գինին արժանացավ արծաթե մեդալի:
Ցուցահանդեսում մեծ էր հետաքրքրությունը «Արմենիա» գինիների հանդեպ: Հայկական արտադրանքն աչքի էր ընկնում բարձրաճաշակությամբ, որակով եւ գնային առաջարկով: Ռուսաստանյան գործընկերները տպավորված էին «Արմենիա Վայն» գինու գործարանի ժամանակակից հզորություններով: Ռուսաստանի խոշոր ընկերությունների հետ ներկայումս բանակցություններ են սկսվել «Արմենիա» գինիները Ռուսաստան ներկրելու հնարավորությունների շուրջ: