Գորկի-25 թաղամասում գտնվող հացի փռի պայթյունի զոհերի թիվը հասել է չորսի: Մերձմոսկովյան Այրվածքաբանության կենտրոնի վերակենդանացման բաժանմունքում մահացել է 17-ամյա Իլհան Միրքազարիմովը:
Երիտասարդը, որն էլ, ենթադրվում է, ողբերգության մեղավորն է, պայթյունի հետեւանքով մարմնի 90%-ի այրվածքներ էր ստացել, եւ գործնականում նրան փրկելու հնար չի եղել: Նախնական հետաքննության տվյալներով` հենց նա է գազի բալոնը տաքացրել զոդման լամպով, ինչի արդյունքում էլ հրդեհ է բռնկվել:
Հիշեցնենք, որ այսօր առավոտյան հայտնի էր դարձել տուժածներից եւս մեկի մահվան մասին: Life News -ի տվյալներով` մահացածը կին է: Դատելով ավելի վաղ ներկայացված ցուցակից` մահացածը հայ է:
Ավելի վաղ բերման ենթարկված փռի սեփականատեր Ռաֆիկ Մարգարյանը այսօր 10 օրով կալանավորվել է, որից հետո կորոշվի կալանքի ժամկետի երկարացման հարցը:
