Երեւանի պետական լեզվաբանական համալսարանում նախանցած տարի ընդունված ռազմավարական ծրագրի շրջանակներում շատ ծրագրեր կան օտարերկրյա գործընկերների հետ շփումների զարգացման, նաեւ կրթության որակի բարձրացման համար: Այդ մասին NEWS.am-ի թղթակցի հետ զրույցում հայտնել է ԵՊԼՀ ռեկտոր Սուրեն Զոլյանը:
«Գլխավորը կրթության որակն ու գիտական մշակումների մակարդակը բարձրացնելն է, ինչը փոխկապակցված է: Եւ իհարկե կարեւոր է փոխել ուսուցման մեթոդները, ավելի մեծ ուշադրություն դարձնել ուսանողների անհատական աշխատանքին, ինքնուրույն աշխատելու, արդյունքների հասնելու հմտությանը»,- ասել է ԵՊԼՀ ռեկտորը:
Նրա խոսքով, դա պահանջում է հրաժարվել կրթության առկա ձեւերից: Ինչպես նշել է Սուրեն Զոլյանը, այսօր շատ կարեւոր է անցնել աշխատանքի տեղեկատվական տեխնոլոգիաների ակտիվ կիրառմամբ, որպեսզի ուսանողն ու դասախոսը իրենք կազմեն ուսումնական ծրագրերն ու աղբյուրներ փնտրեն: «Նաեւ, իրենք կարողանան արագորեն արձագանքել ծագած խնդիրներին: Եթե նախկինում կրթությունը միտված էր նրան, որ յուրաքանչյուրը դեղատոմսերի ցանկ ունենար, այսօր դա անհնար է, քանի որ իրավիճակը շատ արագ է փոխվում, եւ հարկավոր է, որ ուսանողն ու դասախոսը իրենք կարողանան դեղատոմսեր կազմել` իրավիճակի փոփոխությունից կախված»,- նշել է Զոլյանը:
