«Արտակարգ դրության իրավական ռեժիմի մասին» օրենքը, ՀՀ Ազգային Ժողովում առաջին ընթերցմամբ անցնելուց հետո ետ է կանչվել կառավարության կողմից եւ ենթարկվել նոր փոփոխությունների: Այդ մասին այսօր` փետրվարի 23-ին, կառավարության նիստում հայտարարեց ՀՀ արդարադատության նախարար Հրայր Թովմասյանը:
Նրա տեղեկացմամբ` նպատակահարմար է գտնվել օրենքի նախագիծը խորհրդարանին ներկայացնել փաթեթային տարբերակով, մասնավորապես` փոփոխություններ են առաջարկվում նաեւ վարչական իրավախախտումների օրենսգրքում: Այդ փոփոխություններով սահմանվում են պատասխանատվության միջոցներ, օրինակ` սննդամթերքի իրացման անվտանգության կանոնները խախտելու համար:
Սակայն հիմնական փոփոխությունը վերաբերում է արտակարգ ռեժիմներում զինված ուժերի օգտագործմանը: Ըստ արդարադատության նախարարի` կատարվել են 2 կարեւոր փոփոխություններ: Առաջին` զինված ուժերը արտակարգ դրության ռեժիմում կարող են ներգրավվել միայն հատուկ պատրաստություն անցնելուց հետո (ներքին զորքերի կանոնակարգին համապատասխան):
Երկրորդ` հստակ սահմանվել է, թե ինչ նպատակներով եւ ինչ ուժերի դեմ կարող են գործել զինված ուժերի ստորաբաժանումները: Ըստ արդարադատության նախարարի` բացառվելու է բնակչության հետ բանակի շփումը: Բանակը օգտագործվելու է արտակարգ իրավիճակների հետեւանքները վերացնելու, ազգաբնակչությանը տարհանելու, մշակութային արժեքները տեղափոխելու, հատուկ պաշտպանվող օբյեկտները պաշտպանելու նպատակով: «Մի քանի սահմանափակում եւ զսպաշապիկ է կիրառվելու զինված ուժերը արտակարգ ռեժիմներում օգտագործելու համար»,- ասաց Հ. Թովմասյանը:
Արդարադատության նախարարի առաջարկով` այս փոփոխությունները անհետաձգելի կարգով կներկայացվեն խորհրդարանին: