Լրատվամիջոցները նոր տվյալներ են հաղորդում Իրաքում ահաբեկչությունների շարքի արդյունքում զոհվածների եւ տուժածների վերաբերյալ: «Ալ Ջազիրա» հեռուստաալիքի տվյալներով` շուրջ 40 մարդ զոհվել, 180-ից ավելին վիրավորվել են:
Ականապատ ավտոմեքենաները մահապարտների կողմից պայթեցվել էին Քիրքուքում, ինչպես նաեւ շիաների սուրբ քաղաք Քերբելում:
Եւս մեկ ականապատ մեքենա պայթել էր Բաղդադում` ԱԳՆ-ի շենքի մոտ, մյուս պայթուցիկը կիրառվել էր Դիյալա նահանգի Էլ Մահմուդիա քաղաքում` ոստիկանական հերթապահի ճանապարհին: Սունիական Անբար նահանգի Ռամադում մահափորձ է կատարվել նահանգապետի դեմ: Նա ողջ է մնացել, սակայն զոհվել են նրա շրջապատի մի քանի մարդիկ: Ընդհանուր առմամբ, առավոտյան ժամերին երկրում տեղի են ունեցել 14 պայթյուններ:
Ինչպես հայտնում է ԻՏԱՌ-ՏԱՍՍ-ը, Իրաքում ահաբեկչությունների շարքն իրականացվել է արտասահմանյան կոալիցիայի զորքերի` Իրաք ներխուժելու իններորդ տարելիցի կապակցությամբ եւ Բաղդադում ԱՊԼ-ի գագաթաժողովի բացումից մի քանի օր առաջ, որն արաբական այս երկրում 1990 թվականից հետո տեղի կունենա առաջին անգամ: Ինչպես հայտնել են երկրի ԱԳՆ-ում, «Ալ Կաիդա» ահաբեկչական ցանցի գրոհայինները փորձում են երկրում քաոս հրահրել միջարաբական հանդիպման նախօրեին: