Հայաստանի Վերահսկիչ պալատի նախագահ Իշխան Զաքարյանն ընդունել է Համաշխարհային բանկի Եվրոպայի եւ Կենտրոնական Ասիայի տարածաշրջանի Հարավային Կովկասի երկրների դեպարտամենտի տարածաշրջանային տնօրեն Ասադ Ալամին:
ՎՊ մամուլի ծառայությունից NEWS.am-ին հայտնում են, որ Համաշխարհային բանկի հետ համագարծակցության առումով ՎՊ նախագահը առաջնային է համարել շինարարության, գնումների ոլորտներում եւ մրցույթների անցկացման ուղղությամբ կատարվելիք բարեփոխումները:
Իշխան Զաքարյանը տեղեկացրել է նաեւ, որ հանրապետության նախագահի հետ քննարկվել է պետական բյուջեի օպերատիվ վերահսկողության հարցը: Այս առումով պալատին առաջին հերթին անհրաժեշտ են մարդկային ռեսուրսներ, ինչպես նաեւ տեխնիկական բազայի հզորացում եւ օրենսդրական դաշտի բարելավում:
Այնուհետեւ զրուցակիցները քննարկել են երկկողմ համագործակցությանը վերաբերող հարցեր:
Ասադ Ալամը, շնորհակալություն հայտնելով ՎՊ-ին մոտեցումների եւ աշխատաոճի համար, նշել է, որ Համաշխարհային բանկը մեծ ուշադրություն է դարձնում պալատի կատարած աշխատանքներին, քանի որ լուրջ միջոցներ է ներդնում կառավարության ծրագրերի իրականացման ուղղությամբ: Ասադ Ալամը բարձր է գնահատել Վերահսկիչ պալատի ` անկախ լինելու, միջազգային չափանիշներով աշխատելու նաեւ մարդկային եւ մասնագիտական ռեսուրսների հզորացման հետ կապված տեսակետը:
Նշենք, որ «Վերահսկիչ պալատի հզորացում» ծրագրով համաշխարհային բանկը 478.000 ԱՄՆ դոլար դրամաշնորհ է հատկացրել Վերահսկիչ պալատին`վերջինիս կարողությունների ուժեղացման նպատակով:
