Դոմինիկ Սթրոս Կանին պաշտոնապես մեղադրանք են ներկայացրել կավատության գործով: Ըստ հետաքննության տվյալների` ֆինանսիստը մասնակցել է շքեղ երեկոների մարմնավաճառների հետ: Այդ մասին հայտնել է ԱՄՀ-ի նախկին ղեկավարի փաստաբան Ռիշար Մալքը:
Սթրոս Կանը մեղադրվում է ֆրանսիական Լիլում գտնվող «Կառլտոն» թանկարժեք հյուրանոցում աշխատող կավատների եւ այնտեղից ամբողջ Ֆրանսիայով էլիտար երեկույթներին մարմնավաճառներ մատակարարելու գործի շրջանակներում:
Ոստիկանության տրամադրության տակ է հայտնվել Դ. Սթրոս Կաննի sms-նամակագրական կապը երեկույթների կազմակերպիչներից մեկի հետ: Որոշ ժամանակ անց ԱՄՀ-ի նախկին ղեկավարին ձերբակալեցին եւ բերման ենթարկեցին Լիլի ոստիկանատուն: Նրան գրավի դիմաց բաց էին թողել` պարտավորեցնելով հարցաքննության ներկայանալ մարտի 28-ին:
Ինքը` Դ. Սթրոս Կանը, ժխտում է բոլոր մեղադրանքները` հայտարարելով, որ չի կասկածել, որ Լիլի «Կառլտոնի» երեկույթների կանայք, որոնց հետ ժամանակ էր անցկացրել, մարմնավաճառներ են եղել, հայտնում է rbc-ն:
Հիշեցնենք, Դ. Սթրոս Կանը 2011թ. մայիսի 14-ին (այն ժամանակ` ԱՄՀ ղեկավար) ձերբակալվել էր Նյու Յորքի հյուրանոցի սպասուհի Նոֆիսաթոու Դիալոյի նկատմամբ սեռական ոտնձգության մեղադրանքով: Նա կալանքի տակ մնացել էր մի քանի օր, իսկ ԱՄՀ ղեկավարի պաշտոնից հրաժարվելուց հետո մեկ մլն դոլար գրավի դիմաց ազատ էր արձակվել:
Դատավարության ընթացքում Նոֆիսաթոու Դիալոյի կողմից սուտ ցուցմունքներ հայտնաբերելու արդյունքում Սթրոս Կանի նկատմամբ քրեական հետապնդումը դադարեցվել էր:
Նախքան Նյու Յորքի հյուրանոցի միջադեպը, Սթրոս Կանը համարվում էր Ֆրանսիայի առաջիկա նախագահական ընտրությունների հիմնական ֆավորիտներից եւ կարող էր գործող նախագահ Սարկոզիի համար լուրջ մրցակից լինել:
