Մոսկվայի Պուշկինի հրապարակում ռուսաստանյան ընդդիմության ներկայացուցիչների հանդիպումն ավարտվել է երեք մարդու ձերբակալմամբ:
Ոստիկանության հաղորդմամբ, երկու մասնակիցներ ձերբակալվել են պաստառները բացելուց հետո, թեեւ ակցիայի ձեւաչափը պաստառ չէր ենթադրում: Եւս մեկին ձերբակալել են այն բանից հետո, երբ նա սկսել էր կոչ անել հրապարակից հեռանալ Պուշկինի, Լերմոնտովի եւ Դոստոեւսկու կերպարներով այնտեղ հայտնված Միասնական գործողությունների շտաբի մասնակիցներին: «Պոետներն» էլ բանաստեղծություններից հատվածներ են ներկայացրել, հաղորդում է «Գազետան»:
Մայրաքաղաքային իշխանությունները ընդդիմադիրներին թույլ չեն տվել մարտի 31-ին հավաքվել Պուշկինի հրապարակում, սակայն «Ձախ ճակատի» համակարգող Սերգեյ Ուդալցովը լրագրողներին ավելի վաղ հայտարարել էր, որ ընդդիմադիր շարժման ներկյացուցիչները մտադիր են «աշխատանքային հանդիպում» անցկացնել` «Ժողովրդական երթի» մանրամասները քննարկելու համար: Կազմակերպիչներն ասել էին, որ դա հանրահավաք չէ, եւ կարգախոսներ ու ցուցապաստառներ չեն լինելու: