նախընտրելի դարձնելՀայաստանում խորհրդարանական ընտրությունների նախաշեմին պատասխանողների 56%-ը չի հավատում ազատ, թափանցիկ եւ արդար ընտրությունների անցկացմանը: Այդ մասին ապրիլի 17-ի մամլո ասուլիսին հայտարարել է դոկտոր Ռասա Ալիշաուսկենեն «The Gallup Organization»-ից:
Ըստ նրա` հարցվածների 36%-ը վստահություն է հայտնել, որ կանցկացվեն ազատ եւ արդար ընտրություններ: 58%-ը նշել է, որ կմասնակցի քվեարկությանը պարտադիր կերպով, 30%-ը հայտարարել էն, որ ամենայն հավանականությամբ կմասնակցեն քվեարկությանը, հարցվածների մնացած մասն էլ դեռեւս չի կողմնորոշվել այդ հարցում:
Ալիշաուսկենեն կարծիք է հայտնել, որ դա կարող է խանգարել քվեարկությանն ընտրողների ակտիվ մասնակցությանը, քանի որ եթե միջին ընտրողը կողմնակալ վերաբերվի ընտրություններին եւ մտածի, որ իր ձայնը ոչինչ չի որոշում, ապա պարզապես չի մասնակցի ընտրական գործընթացին:
Հարցումները ցույց են տվել, որ կուսակցությունների եւ ընտրական գործընթացների մասին հիմնական տեղեկությունը հարցվածների 96%-ն ստանում է հեռուստատեսությունից, 31%-ը նշել են ռադիոն, 31%-ը որպես աղբյուր անվանել են նաեւ ընկերներին եւ ծանոթներին, 26%-ը` համացանցը, 25% -ը` թերթերը, 6%-ը` քաղաքական գործիչների հետ հանդիպումները, 5%-ը` նախընտրական պաստառները, տրանսպորտի վրա գրառումները: Ըստ Ալիշաուսկենեի` երիտասարդների շարքում տեղեկատվության աղբյուրի առաջին տեղում համացանցն է, իսկ հետո արդեն հեռուստատեսությունն ու թերթերը: Երեւանում համացանցի դերն ընտրական քարոզարշավում ավելի կարեւոր է, քան երկրի այլ քաղաքներում:
Նշենք, որ հարցումը կատարել է «The Gallup Organization»-ը` Հայաստանի սոցիոլոգիական ասոցիացիայի հետ համատեղ:
Հարցումների արդյունքում զեղծարարությունների հնարավորությունը չի գերազանցում +/- 3,1%-ը, վստահության մակարդակը` 95%-ը:
Լուսանկարը` Սոնա Բարսեղյանի
