ՆախընտրելիՇիրակի մարզ աշխատանքային այցի շրջանակում «Ուժեղ Հայաստան» կուսակցության անդամներն այցելել են Գյումրի և Արթիկ քաղաքներ։
Այցը մեկնարկել է Արթիկից, որտեղ Անկախության 44/1 հասցեում բացվել է «Ուժեղ Հայաստան» կուսակցության տարածքային գրասենյակը։
Կուսակցության խորհրդի անդամ Նարեկ Կարապետյանը, խոսելով Արթիկ համայնքի մասին, նշել է, որ շուրջ 50 հազար բնակչություն ունեցող համայնքը ժամանակին արդյունաբերական կենտրոն էր, և Արթիկը Հայաստանում ասոցացվում էր շինանյութերի ու շինարարական հումքի կենտրոնի հետ։
«Այսօր, եթե շրջենք յուրաքանչյուր համայնքով, կտեսնենք, որ տղամարդկանց զգալի մասը Հայաստանից դուրս է եկել։ Նույն վիճակն այստեղ է, նույն վիճակը՝ Շիրակի հյուսիսում, նույնը՝ Գեղարքունիքում, նույնը՝ իմ հայրենի համայնքում։ Դուք թողնում եք համայնքը և գնում, որովհետև այստեղ աշխատանք չկա»։
Ըստ Կարապետյանի՝ դրա հիմնական պատճառը աշխատատեղերի բացակայությունն է։
«Ո՞վ է այն մարդը, որ այսօր պետք է գա՝ Հայաստանն առաջնորդելու։ Այդ մարդը մեզ պես, ձեզ պես մարդ է, ով ժամանակին գնացել է արտագնա աշխատանքի, հաջողությունների հասել, բայց չի մոռացել իր հայրենի համայնքն ու հայրենիքը, և հաջողության հասնելուց հետո ամեն անգամ աջակցել է իր երկրին»,- նշել է Նարեկ Կարապետյանը՝ անդրադառնալով Սամվել Կարապետյանի ներկայացրած փոփոխությունների ծրագրերին։
Հանդիպում Գյումրիում
Գյումրիի Վարդան Աճեմյանի անվան պետական դրամատիկական թատրոնում կայացել է «Ուժեղ Հայաստան» դաշինքի անդամների հանդիպումը Շիրակի մարզի համակիրների հետ։ Իր խոսքում կուսակցության խորհրդի անդամ Նարեկ Կարապետյանն անդրադարձել է Շիրակի մարզում և Գյումրիում առկա խնդիրներին՝ շեշտելով, որ Շիրակը ոչ միայն Հայաստանի ամենաաղքատ մարզերից մեկն է, այլև 2018 թվականի իշխանափոխությունից հետո մարզում աղքատության ցուցանիշն աճել է, իսկ մարզում բնակվող յուրաքանչյուր երկրորդ երեխան ապրում է աղքատության մեջ։
«Վերջին տարիներին Հայաստանի Հանրապետությունը վերցրել է 8 միլիարդ դոլարի վարկ։ Ամեն ընտանիքի վրա այս իշխանությունը դրել է 10 հազար դոլարի վարկային բեռ։ Եթե դրա թեկուզ մեկ տոկոսը ծախսվեր Գյումրիի համար, այսօր Գյումրիում անտուն մարդ չէր լինի», - նշել է Նարեկ Կարապետյանը։
Այնուհետև նա ներկայացրել է «Ուժեղ Հայաստան» կուսակցության նախագահ Սամվել Կարապետյանի առաջարկած ծրագրերը։ Մասնավորապես, խոսելով ծայրահեղ աղքատության հաղթահարման ծրագրի մասին, Նարեկ Կարապետյանը նշել է. «Ստեղծվում է ծայրահեղ աղքատության հաղթահարման պետական հիմնադրամ, որի մասին երեք օր առաջ Սամվել Կարապետյանի ներկայությամբ հայտարարել ենք։ Այդ հիմնադրամում որոշակի գումար է ներդնում պետությունը, իսկ մնացած մասը՝ աշխարհի ուժեղ հայերը։ Ծայրահեղ աղքատության մեջ ապրող ընտանիքները, որոնց զգալի մասը Գյումրիում է, 5 հոգանոց ընտանիքի հաշվով սկսելու են ստանալ ամսական 150 հազար դրամ, որպեսզի աշխատանքի հետ զուգահեռ կարողանան somehow հոգալ երեխաների կրթության և առողջապահության հարցերը։ Սա առաջին մեծ փոփոխությունն է, որ ուզում ենք իրականացնել։ 6 ամսվա ընթացքում Հայաստանում ծայրահեղ աղքատ մարդ չպետք է լինի», - նշել է Նարեկ Կարապետյանը։
Անդրադառնալով Գյումրիի զարգացման տեսլականին՝ Նարեկ Կարապետյանը նշել է, որ, հաշվի առնելով քաղաքի պատմամշակութային ժառանգությունը, Գյումրին կարող է դառնալ տուրիզմի ամենապահանջված ուղղություններից մեկը։ Նա նաև խոսել է գյումրեցիների՝ սպորտում ունեցած հաջողությունների մասին։
Հանդիպումից հետո կուսակցության անդամները քայլերթ են կատարել հայրաքաղաքի կենտրոնական փողոցներով և շփվել գյումրեցիների հետ։ Քայլերթի ընթացքում նրանք անցել են տնային կալանքի տակ գտնվող Միքայել Սրբազանի կեցավայրի մոտով և «ազատություն, ազատություն» վանկարկումներով ողջունել պատշգամբից իրենց միացած Սրբազանին։
