նախընտրելի դարձնելՄենք պետք է հունիսի 7-ին գնանք ընտրատեղամասեր և մերժենք Ալիևի թեկնածուին ու հայ ժողովրդի պատմությունը զրոյացնելու այս քաղաքականությունը։ Այս մասին այսօր՝ մայիսի 16-ին, հանրահավաքում ունեցած ելույթի ժամանակ հայտարարել է ԱԺ պատգամավոր, «Հայաստան» դաշինքի անդամ Աննա Գրիգորյանը։
2018 թվականին իշխանության գալուց հետո ներկայիս իշխող թիմի առաջնորդը հայտարարեց, որ Արցախի շուրջ բանակցությունները սկսում է զրոյից, որի արդյունքը եղավ Արցախի հանձնումը։ Հիմա նրանք համարձակություն ունեն զրոյի վերածելու հայ ժողովրդի պատմությունը։ Նրանք ասում են՝ այն, ինչ եղել է անցյալում, մնացել է անցյալում, դա սխալ էր, ճակատագրական սխալ։ Բայց ո՞վ են նրանք, որ մեր ժողովրդի պատմությունը զրոյից գրեն, հարց է բարձրացրել նա։
Գրիգորյանը նշել է, որ Հայաստանի ժողովուրդը թույլ չի տա կասկածի տակ դնել իր պատմությունը, իր սրբությունները և իր ազգային խորհրդանիշները, իսկ ներկայիս իշխող ուժին կվերածի քաղաքական զրոյի։
Նա ընդգծել է, որ անհրաժեշտ է կառուցել այնպիսի երկիր, որտեղ բոլորը, առանց բացառության, գլուխ կխոնարհեն միայն հերոսների ծնողների առաջ, ոչ թե թշնամիների, ինչպես անում է ներկայիս իշխանությունը։
Այն, ինչի համար մենք պայքարում ենք, Հայաստանի Հանրապետության պահպանումն է և դրա՝ Արևմտյան Ադրբեջանի վերածվելը թույլ չտալը, հայտարարել է ընդդիմադիր գործիչը։
Նա ընդգծել է, որ Նիկոլ Փաշինյանին ձայն տալը նույնն է, ինչ Ալիևին ձայն տալը, որովհետև իրենց էությամբ և մոտեցումներով նրանք գրեթե նույնական են։
«Ալիևն էլ է ասում, որ մեր Անկախության հռչակագիրը հակամարտություն է առաջացնում։ Ալիևն էլ մեր եկեղեցու վրա կհարձակվեր այնպես, ինչպես դա անում է Նիկոլ Փաշինյանը, թեև կարծում եմ՝ նա, հնարավոր է, նույնիսկ ավելի մեծ հարգանք ցուցաբերեր մեր հոգևոր առաջնորդների նկատմամբ։ Ալիևն էլ տարածքային պահանջներ է ներկայացնում, և Նիկոլ Փաշինյանն էլ է ասում, որ այդ տարածքները հայկական չեն։ Այսօր նա, կարծես, արդեն պաշտոնապես հայտարարում է, որ կան տարածքներ, որոնք պետք է հանձնվեն Ադրբեջանին։ Այդ դեպքում ո՞րն է տարբերությունը Փաշինյանի և Ալիևի միջև։ Հարց է առաջանում․ եթե այսօր Ալիևն առաջադրեր իր թեկնածությունը, մի՞թե որևէ մեկը կքվեարկեր նրա օգտին»,- հայտարարել է Գրիգորյանը։
Նրա գնահատմամբ՝ այսօր արդեն ակնհայտ է, որ, ընտրելով Նիկոլ Փաշինյանին, հայ ժողովուրդն անուղղակիորեն ընտրում է Ալիևին, և այս գործընթացն իսկապես պետք է կանգնեցվի։
«Ամբողջ նախընտրական արշավի ընթացքում մենք ներկայացնում ենք տարբեր ծրագրեր՝ գյուղատնտեսության, տնտեսության, կրթության որակի և բազմաթիվ այլ ոլորտներում։ Բայց կան իսկապես հիմնարար հարցեր՝ մեր պատմության պահպանման հարցը, մեր երեխաների ապագայի հարցը, մեր հավատի և եկեղեցու պաշտպանության հարցը, Սահմանադրության պաշտպանության հարցը, մեր ծնողների պաշտպանության և ընդհանրապես մեր արժեքների պահպանման հարցը։ Եվ ես ոչ մի վայրկյան չեմ կասկածում, որ միասին մենք կարող ենք պաշտպանել այս ամենը»,- հայտարարել է նա։
