Նովոռոսիյսկում օգոստոսի 12-ի գիշերը անօդաչու թռչող սարքը հարվածել է արցախցի 65-ամյա Էլմիրա Գրիգորյանի տանը։ Նա ավելի քան 30 տարի առաջ Ստեփանակերտից էր տեղափոխվել այս քաղաք՝ Լեռնային Ղարաբաղում մարտական գործողությունների պատճառով։

Քաղաքի վրա հարձակումը սկսվել էր ժամը 22:00-ի սահմաններում և շարունակվել մինչև առավոտ: ԱԹՍ-ի հարվածի պահին Էլմիրան խոհանոցում էր: Հարձակման պատճառով այդ պահին քաղաքում կապ չկար: Ըստ ընտանիքի տվյալների, տանը հարվածել են գիշերվա ժամը 2-3-ի սահմաններում:

Պայթյունի հետևանքով քանդվել է տան արտաքին պատը, խոհանոցի պատուհանները կոտրվել են։ Էլմիրան ստացել է միջին ծանրության բեկորային վնասվածքներ. ապակու բեկորները լրջորեն վնասել են նրա դեմքը։ Կինը մինչև առավոտ մնացել է վնասված տանը: Բջջային կապի բացակայության պատճառով նա չէր կարողացել կապվել դստեր հետ:

Առավոտյան, երբ ԱԹՍ-ների հարձակման վտանգն անցել է, դուստրն այցելել է Էլմիրային և շտապօգնություն կանչել: Բուժաշխատողներն օգնություն են ցուցաբերել տուժածին: Զննումից հետո որոշել են, որ հոսպիտալացման կարիք չկա։

Էլմիրայի դուստրը հայտնել է, որ տունը վերականգնման ենթակա չէ, իսկ ներսում գտնվելը վտանգավոր է՝ փլուզման սպառնալիքի պատճառով։

«Մինչև հիմա չեմ կարողանում հավատալ, որ սա պատահել է մեզ հետ, մայրիկիս հետ»,- պատմել է Էլմիրա Գրիգորյանի դուստրը՝ Էլինան:

Այժմ ընտանիքն ապրում է կնոջ ընկերուհու տանը և փաստաթղթեր է հավաքում պետությունից փոխհատուցում ստանալու համար:

Էլմիրայի ընտանիքը Նովոռոսիյսկ էր տեղափոխվել 1993 թվականի սկզբին՝ Ստեփանակերտից։ Լեռնային Ղարաբաղում պատերազմի պատճառով նրանք ստիպված են եղել թողնել իրենց տունը և ի վերջո հաստատվել Ռուսաստանում։