NEWS.am տեղեկատվական-վերլուծական գործակալության ներկայացուցիչները, որոնք մասնակցում են Չինաստանում Շանհայի համագործակցության կազմակերպության (ՇՀԿ) անդամ երկրների երիտասարդ մեդիա մասնագետների համար նախատեսված ուսումնական ծրագրին, այցելել են Ներքին Մոնղոլիայի ինքնավար շրջանի Օրդոս քաղաքում գտնվող Ordos Convergence Media Center մեդիահոլդինգ։

Ordos Convergence Media Center-ը պարզապես ավանդական թերթի խմբագրություն կամ հեռուստատեսային ստուդիա չէ, այլ տարածաշրջանի խոշոր մեդիա կառուցվածք և հաղորդակցական հարթակ։ Կենտրոնը ստեղծում և տարածում է բովանդակություն տպագիր հրատարակությունների, ռադիոյի, հեռուստատեսության, կայքերի, բջջային հավելվածների և սոցիալական ցանցերի համար։

Ներկայումս կենտրոնի կառուցվածքում ներառված են Ordos Daily թերթի երկու հրատարակություն, երեք ռադիոհաճախականություն, երեք հեռուստաալիք, Nuan News կայքն ու բջջային հավելվածը, ինչպես նաև նոր մեդիայի շուրջ 20 հաշիվ և հարթակ։

Թերթի, ռադիոյի, հեռուստատեսության և թվային ԶԼՄ-ների առանձին խմբագրությունների աշխատանքի փոխարեն կենտրոնը կիրառում է միասնական ինտեգրված համակարգ։ Մեկ լրագրողական նյութը կարող է միաժամանակ հարմարեցվել տարբեր ձևաչափերի և տարածվել միանգամից մի քանի մեդիա հարթակներով։

Կենտրոնը նաև ունի ինտեգրված մեդիա հարթակ, որի աշխատանքում կիրառվում են ժամանակակից տեխնոլոգիաներ, այդ թվում՝ նյութերի խմբագրման համար արհեստական բանականության գործիքներ, մեծ տվյալների հիման վրա հանրային կարծիքի վերլուծություն, ինչպես նաև վիրտուալ հաղորդավարներ։

Բացի այդ, Nuan News-ի կազմում գործում է մեդիայի ոլորտի մասնագետների համար ուսումնական-գործնական բազա։ Այցելուները կարող են ծանոթանալ տարբեր ստորաբաժանումների աշխատանքին՝ հեռուստատեսային արտադրությունից և ռադիոհեռարձակումից մինչև թերթերի թողարկում և ժամանակակից զանգվածային լրատվամիջոցների գործունեության հետ կապված այլ գործընթացներ։

Այցի ընթացքում «Հայաստանի լուրեր»-NEWS.am-ի ներկայացուցիչները ծանոթացել են կենտրոնի աշխատանքի կազմակերպմանը, դրա տեխնիկական հնարավորություններին և ավանդական ու թվային մեդիայի ինտեգրման մոտեցումներին։