նախընտրելի դարձնելՄոսկվան կարծում է, որ Անկարայում հակառուսական միջոցառումների անցկացումը, որի մասնակիցներն ուղղակիորեն սպառնում են ՌԴ-ի տարածքային ամբողջականությանը եւ նրա քաղաքացիների անվտանգությանը, անթույլատրելի է եւ ստվերում է երկու երկրների երկխոսությունը: Այդ մասին մայիսի 18-ի ճեպազրույցի ժամանակ հայտարարել է Ռուսաստանի ԱԳՆ-ի պաշտոնական ներկայացուցիչ Ալեքսանդր Լուկաշեւիչը:
«Թուրքիայում միջոցառումների անցկացումը, որի մասնակիցներն ուղղակիորեն սպառնում են ՌԴ-ի տարածքային ամբողջականությանը, նրա քաղաքացիների անվտանգությանը, անթույլատրելի է», - ասել է նա` մեկնաբանելով Ստամբուլում Կովկասի հարցով միջազգային կոնֆերանսի անցկացումը, որի արդյունքում հռչակագիր էր ընդունվել, հաղորդում է «ՌԻԱ Նովոստին»:
Լուկաշեւիչն ընդգծել է, որ նման հանդիպումները «ստվերում են մեր երկրների միջեւ գործընկերության մթնոլորտը, եւ պետք է իշխանությունների կողմից արգելքի հանդիպեն (Թուրքիայի- խմբ.)»:
Նշենք, որ «Կովկասն առանց Ռուսաստանի» կոնֆերանսը տեղի է ունեցել Ստամբուլում` մայիսի 13-ին: Ըստ «Էխո Կավկազա» ռադիոյի տվյալների, միջոցառմանը մասնակցել են Եվրոպայի, արաբական երկրների կովկասյան սփյուռքի ներկայացուցիչները, լրագրողներ եւ իրավապահներ Ճապոնիայից, Վրաստանից եւ Եվրամիությունից: Թուրքական կողմը ներկայացվել է կոնֆերանսի կազմակերպիչների` «Իմքանդեր» բարեգործական հիմնադրամի կողմից:
Ըստ կոնֆերանսի կազմակերպիչների` հիմնական նպատակը Կովկասի ժողովուրդների միավորումն է: Իսկ Ռուսաստանի «զավթողական ազդեցությունից ազատվելու» միակ ելքն անկախությունն է:
